भारतमा अभिनेताको भेलामा भागदौड मच्चिदा ३९ जनाको मृत्यु !

विश्व प्रवास

- न्युज नेपाल

काठमाडौं । तमिलनाडुको करुरमा शनिबार अभिनेता थलापति विजयको राजनीतिक र्‍यालीका क्रममा भएको भागदौडमा मृत्यु हुनेको संख्या ३९ पुगेको छ।

तमिलनाडुका स्वास्थ्य सचिव पी सेन्थिल कुमारले सञ्चारमाध्यमलाई बताएअनुसार दुर्घटनामा हालसम्म ३९ जनाको मृत्यु भएको छ र ९५ जना घाइते अस्पतालमा भर्ना छन्। तमिलनाडुका मुख्यमन्त्री एमके स्टालिनले दुर्घटनाको बारेमा एक विज्ञप्तिमा मृतकका परिवारलाई प्रतिव्यक्ति १० लाख रुपैयाँ क्षतिपूर्ति दिने घोषणा पनि गरेका छन्।

यसैबीच, अभिनेता विजयले सामाजिक सञ्जाल वेबसाइट एक्समा पोस्ट गर्दै घटनाप्रति गहिरो दुःख व्यक्त गरेका छन्। उनले आफू गहिरो पीडामा रहेको पनि बताएका छन्। यस घटनाको छानबिन गर्न उच्च अदालतका सेवानिवृत्त न्यायाधीश अरुणा जगदीसनको नेतृत्वमा एक सदस्यीय जाँच आयोग पनि गठन गरिएको छ। शनिबार साँझ करूरमा तमिलगा भेट्टी कझगम पार्टीको र्‍यालीलाई सम्बोधन गर्दै गर्दा उक्त दुर्घटना भएको हो।

समाचार एजेन्सी पीटीआईका अनुसार विजयले सभालाई सम्बोधन गरिरहेको बेला भीड बढ्दै जाँदा धेरै मानिस बेहोस भएका थिए। समारोहमा होहल्ला गर्दा भीड अनियन्त्रित हुँदै गएको छ। दुर्घटनापछि तमिलनाडुका मुख्यमन्त्री स्टालिनले जिल्लामा आपतकालीन प्रोटोकल लागू गर्न आदेश दिएका छन्। यद्यपि, मृत्यु हुनेको संख्या बढ्न सक्ने बताइएको छ।

त्यस्तै, प्रधानमन्त्री नरेन्द्र मोदीले यस दुर्घटनाप्रति दुःख व्यक्त गरेका छन्। उनले सामाजिक सञ्जालमा लेखेका छन्, ‘आफ्ना प्रियजन गुमाएका परिवारहरूसँग मेरो समवेदना छ। यो कठिन समयमा उनीहरूलाई शक्ति मिलोस् र सबै घाइतेहरूको शीघ्र स्वास्थ्यलाभको कामना गर्दछु।’