टिकटको मिति हेरफेर गर्दा शुल्क लाग्दैनः हिमालय एयरलाइन्स

New Post

- न्यूज नेपाल

काठमाडौं । हिमालय एयरलाइन्सले प्रतिकूल मौसमका कारण प्रभावित यात्रुहरूको टिकटको मिति हेरफेर गर्दा शुल्क नलिने भएको छ ।

एयरलाइसन्ले सोमबार एक विज्ञप्ति जारी गर्दै सडक सञ्जालको अवरोधका कारण काठमाडौं बाहिर रहेका, बेलैमा काठमाडौं आउन नसकेका यात्रुका लागि विशेष छुटको व्यवस्था मिलाइएको हिमालयले जनाएको छ ।

एयरलाइन्सका अनुसार त्रिभुवन अन्तर्राष्ट्रिय विमानस्थल (काठमाडौं) बाट हिमालय एयरलाइन्सका सबै अन्तर्राष्ट्रिय उडानका यात्रुहरूलाई एक पटक निःशुल्क मिति परिवर्तन गर्न पाउने छन् । सामान्य अवस्थामा टिकटको मिति सार्दा शुल्क लाग्ने भए पनि अहिले यात्रुले कुनै अतिरिक्त शुल्क तिर्नु नपर्ने एयरलाइन्सले जनाएको छ ।

२०८२ असोज १८ गतेदेखि २१ (अक्टोबर ४ देखि ७) सम्मको टिकट काटेका यात्रुहरुले यो सुविधा पाउने छन् । प्रभावित यात्रुहरूले आगामी कात्तिक ८ (अक्टोबर २५) भित्र पुनः अर्को मिति निर्धारण गर्न सक्नेछन् ।

एयरलाइन्सले प्रभावित यात्रुहरूलाई आवश्यक छुट कोड ईमेलबाट मार्फत पठाउने जनाएको छ । यसका लागि हिमालय एयरलाइन्स बिक्री कार्यालय गैरिधारा, काठमाडौंमा सम्पर्क गर्नुपर्ने छ ।

आफ्ना यात्रुहरूको सहजता, सुरक्षा र सन्तुष्टिलाई ध्यानमा राख्दै यो व्यवस्था गरिएको एयरलाइन्सले जनाएको छ ।