दिल्लीमा वायु प्रदूषण उच्च, दैनिक सीमाभन्दा १६ गुणा बढी एक्यूआई

नयाँ दिल्ली । भारतको सङ्घीय राजधानी दिल्लीमा वायु प्रदूषण उच्च भएको छ । दिल्लीमा वायु गुणस्तर मापन सूचक एक्यूआई ३०० सम्म पुगेको बीबीसी हिन्दीले जनाएको छ । याे सीमा मानव स्वास्थ्यका लागि घातक हो । विश्व स्वास्थ्य सङ्गठनले एक्यूआई ४० सम्म हुनुलाई स्वस्थ मानेको छ ।

दिल्लीमा केही दिनदेखि दैनिक रूपमा यो सीमाभन्दा १६ गुणा बढी प्रदूषण हुने गरेको छ । झन्डै ३ करोडभन्दा धेरै जनसङ्ख्या रहेको दिल्ली र यसको विशाल महानगरीय क्षेत्र हरेक वर्षजस्तै यस पटक पनि विश्वका सबैभन्दा प्रदूषित राजधानीहरूमध्ये एक बनेको छ ।

जाडो मौसम शुरू हुनासाथ दिल्लीको आकाश बाक्लो धूवाँले ढाकिने परम्परा झैँ बन्दै आएको छ । खेतमा कृषि अवशेष जलाउने, कारखानाबाट निस्कने धूवाँ र गाडीका उत्सर्जन मिसिएर घातक धूवाँको तह तयार हुन्छ । यस्तै दीपावली पर्वका अवसरमा भएको आतशबाजीले थप प्रदूषण वृद्धि हुने भएको छ ।

भारतको वायु गुणस्तर व्यवस्थापन आयोगले आउँदा दिनहरूमा हावाको गुणस्तर अझ बिग्रने चेतावनी दिएको छ । आयोगले डिजेल जेनेरेटरको प्रयोग घटाउन र निरन्तर बिजुली आपूर्ति सुनिश्चित गर्न सम्बन्धित निकायहरूलाई आग्रह गरेको छ ।

वायु प्रदूषण दिल्लीका बासिन्दाहरूका लागि दीर्घकालीन स्वास्थ्य जोखिम बन्दै गएको छ । द ल्यान्सेट प्लानेटरी हेल्थमा सन् २०२३ मा प्रकाशित एक अध्ययन अनुसार सन् २००९ देखि २०१९ सम्म भारतमा वायु प्रदूषणका कारण झन्डै ३८ लाख मानिसले ज्यान गुमाएका थिए । संयुक्त राष्ट्रसङ्घीय बाल कोष (युनिसेफ) ले चेतावनी दिँदै प्रदूषित हावाले बालबालिकालाई तीव्र श्वासप्रश्वास सङ्क्रमणको उच्च जोखिममा पारिरहेको बताएको छ ।

Comments