रुसी राष्ट्रपति पुटिन दुई दिने राजकीय भ्रमणमा भारत आउँदै, यस्तो छ २८ घण्टे भ्रमण तालिका !

राजनीति

- न्यूज नेपाल

काठमाडौं । रूसका राष्ट्रपति भ्लादिमिर पुटिन दुई दिने भ्रमणका लागि आज भारत भ्रमणमा आउँदै छन् ।

भारतीय सञ्चारमाध्यमहरूका अनुसार पुटिन भारतीय समयअनुसार विहीबार अपराह्न ४ बजे नयाँदिल्ली पुग्दै छन् । उनले भारतीय प्रधानमन्त्री नरेन्द्र मोदीसँग कयौं मुद्दाहरूमा छलफल गर्ने कार्यतालिका रहेको छ ।

नयाँ दिल्लीमा पुटिन २८ घण्टा रहने कार्यतालिका रहेको छ । उनको आगमनलाई लक्षित गरी भारतमा सुरक्षा व्यवस्था कडा पारिएको छ ।

यात्राबारे जानकार सरकारी अधिकारीहरूले शुक्रवार पुटिनलाई औपचारिक स्वागत गर्नेछन् । उनको औपचारिक स्वागतपछि २३ औं भारत–रूस शिखर वार्ता सुरू हुनेछ ।

अधिकारीहरूका अनुसार प्रधानमन्त्री मोदीले हैदराबाद हाउसमा पुटिन र उनको प्रतिनिधिमण्डलका लागि दिवाभोज आयोजना गर्ने छन् । पुटिन शुक्रबार बिहान महात्मा गान्धीको समाधिस्थल राजघाट पनि जाने समेत कार्यक्रम रहेको छ।

शिखर वार्तापछि पुटिनले रूसको सरकारी प्रसारकको भारत च्यानलको सुरुवात पनि गर्ने बताइएको छ । तत्पश्चात राष्ट्रपति द्रौपदी मुर्मूले उनको सम्मानमा राजकीय भोज आयोजना गरेको समारोहमा सहभागी हुने छन् ।

शिखर वार्तामा भारतद्वारा रूसी कच्चा तेलको ठूलो मात्रामा गरिएको खरिदका कारण बढ्दो व्यापार घाटाको मुद्दा उठाउने सम्भावना रहेको भारतीय सञ्चारमाध्यमहरूले उल्लेख गरेका छन् ।

यस अघि रूसी राष्ट्रपति पुटिनसन् २०२१ मा नयाँ दिल्ली भ्रमणमा आएका थिए । त्यस्तै, भारतीय प्रधानमन्त्री मोदी गत वर्षको जुलाईमा वार्षिक शिखर सम्मेलनका लागि मस्को गएका थिए ।