चेक रिपब्लिक र दक्षिण अफ्रिकाले बराबरी खेले, क्यानडा र स्वीजरल्याण्डको जीत

काठमाण्डौ । विश्वकप फुटबलमा क्यानडाले समूह बी को दोस्रो खेलमा ऐतिहासिक जित निकालेको छ । क्यानडाले कतारलाई ६–० ले हरायो । क्यानडाका लागि १६औँ मिनेटमा क्लाइल केरिनले पहिलो गोल गरे । ३९औँ मिनेटमा गोल गरेका जोनाथ डेभिसले पहिलो हाफ समाप्त हुनु केही क्षणअघि व्यक्तिगत दोस्रो गोल गरे । पहिलो हाफमा कतारविरुद्ध क्यानडाले ३–० को अग्रता लियो ।

पहिलो हाफको ३३औँ मिनेटमा कतारका होमाम अहमदले रेड कार्ड पाएपछि कतार १० जनामा सीमित भयो । खेलको ५५औँ मिनेटमा कतारका अर्का खेलाडी असिम ओमामिदोलाई पनि रेफ्रीले रेड कार्ड थमाए । कतार नौ जनामा सीमित रह्यो । ६३औँ मिनेटमा लियाम मिलरले क्यानडाका लागि गोल गरे ।खेलको ७४औँ मिनेटमा कतारले आत्मघाती गोल गर्दा स्कोर ५–० पुग्यो । खेलको इन्जुरी समयमा जोनाथन डेभिडले गोल गर्दै घरेलु मैदानमा ह्याट्रिक बनाए । त्यसपछि क्यानडा ६–० ले विजयी भयो । जीतसँगै क्यानडाले अङ्क तालिकामा चार अङ्क जोडेको छ ।

गए राति नै समूह ‘बी’ को खेलमा स्विट्जरल्यान्ड पहिलो जितसहित समूहको शीर्ष स्थानमा उक्लिएको छ भने समूह ‘ए’ मा चेक रिपब्लिक र दक्षिण अफ्रिकाले बराबरी खेलेका छन् । अमेरिकाको लस एन्जलसमा रहेको सोफाइ स्टेडियममा सम्पन्न खेलमा स्विट्जरल्यान्डले बोस्निया एन्ड हर्जगोभिनालाई ४–१ गोल अन्तरले पराजित गर्‍यो । खेलको ७४औँ मिनेटमा जोहान मान्जाम्बीले गोल गर्दै स्विट्जरल्यान्डलाई अग्रता दिलाएका थिए । ८४औँ मिनेटमा रुबेन वर्गास र ९० औँ मिनेटमा मान्जाम्बीले गोल गर्दै टोलीको अग्रता ३–० पुर्‍याए ।

इन्जुरी समयमा एर्मिन माहमिकले एक गोल फर्काए पनि अन्तिम समयमा प्राप्त पेनाल्टीलाई ग्रानिट जाकाले गोलमा परिणत गर्दै स्विट्जरल्यान्डलाई ४–१ को सहज जित दिलाए । यसअघि स्विट्जरल्यान्डले कतारसँग १–१ को बराबरी खेलेको थियो । बोस्निया भने पहिलो खेलमा क्यानडासँग १–१ को बराबरीमा रोकिएको थियो । यस्तै आज बिहान सम्पन्न अर्को खेलमा चेक रिपब्लिक र दक्षिण अफ्रिकाले १–१ को बराबरी खेल्दै अङ्क बाँडेका छन् ।

खेलको पाँचौँ मिनेटमै मिखाइल सेड्लिकको गोलबाट चेक रिपब्लिकले अग्रता लिएको थियो । तर ८१ औँ मिनेटमा प्राप्त पेनाल्टी अवसरलाई थियबो मोनेकाले सदुपयोग गर्दै दक्षिण अफ्रिकाले १–१ को बराबरी बनायो । बराबरीसँगै चेक रिपब्लिक र दक्षिण अफ्रिकाले प्रतियोगितामा पहिलो अङ्क जोडेका छन् । विश्वकपमा आज बिहान पौने ७ बजे मेक्सिको र दक्षिण कोरिया खेल्दैछन् ।

Comments