रास्वपा महाधिवेशनको बन्द सत्र आजदेखि, नेता चयनका लागि निर्वाचन कार्यक्रम अघि बढाइँदै

राजनीति

काठमाडौं । राष्ट्रिय स्वतन्त्र पार्टी (रास्वपा)को पहिलो महाधिवेशन अन्तर्गत आजदेखि बन्द सत्र सुरू हुँदैछ। आइतबार भरतपुरको गेस्ट हाउस चउरमा उद्घाटन समारोह भएको महाधिवेशनको बन्द सत्र चितवन प्रदर्शनी केन्द्रमा हुनेछ।

बन्द सत्रमा अध्यक्ष रवि लामिछानेले राजनीतिक प्रतिवेदन पेश गर्नेछन्। त्यस्तै विधान संशोधन प्रस्ताव लगायत अन्य प्रस्ताव पनि बन्द सत्रमा पेश हुनेछ। रास्वपाले बन्द सत्रसँगै निर्वाचन कार्यक्रम पनि सँगसँगै अघि बढाउने भएको छ। आइतबार मात्रै रास्वपाले निर्वाचन कार्यतालिका संशोधन गरेको थियो। संशोधित निर्वाचन कार्यक्रम अन्तर्गत बिहान आइतबार बिहान ७ बजे महाधिवेशन प्रतिनिधिको प्रारम्भिक नामावली प्रकाशन गरिसकिएको छ। बाँकी रहेको मधेस प्रदेशका प्रतिनिधिहरुको सूची पनि सार्वजनिक गरिएको छ। सोमबार बिहान १० बजे निर्वाचन कार्यालयले महाधिवेशन प्रतिनिधिको अन्तिम नामावली प्रकाशन गर्ने छ।

सोमबार १ बजेदेखि पहिलो चरणको निर्वाचन (पार्टी सभापति र केन्द्रीय सदस्य) उम्मेदवारी मनोनयनका लागि निर्वाचन आयोगको सम्पर्क कार्यालयबाट फाराम वितरण सुरू गरिने छ। दिउँसो २ बजेदेखि उम्मेदवारी मनोनयन पत्र दर्ता सुरू गरिने छ। दर्ता ४ बजेसम्म गरिने छ। सोमबार साँझ ८ बजे उम्मेदवारहरूको प्रारम्भिक नामावली प्रकाशन गरिने छ। पार्टीको वेबसाइट र निर्वाचन आयोगको सम्पर्क सचिवालयमा नामावली प्रकाशन गरिने छ।

उम्मेदवारहरूविरूद्ध दाबी विरोध गर्ने समय प्रथम नामावली प्रकाशनपछि १ घण्टा दिइएको छ। ७ बजेदेखि ९ बजेसम्म ती दाबी परेका उम्मेदवारहरूबारे जाँचबुझ गरिने छ। सोमबार राति ९ बजेर १५ मिनेटसम्म उम्मेदवारहरूले उम्मेदवारी फिर्ता लिन पाउने अन्तिम समय तोकिएको छ। राति ११ बजे उम्मेदवारहरूको अन्तिम नामावली प्रकाशन गरिने छ।

मंगलबार बिहान ७ देखि ८:३० सम्म मौन अवधि तोकिएको छ। त्यसपछि ८:३० बजेदेखि दिउँसो ३ बजेसम्म पहिलो चरणको मतदानको समय तोकिएको छ। त्यसपछि दोस्रो चरणको (पार्टी पदाधिकारीका लागि) निर्वाचन प्रक्रिया सुरू हुने छ। तर दोस्रो चरणको कार्यतालिका पछि तोकिने जनाइएको छ।