११ महिनामा आयातनिर्यात दुवै बढ्यो, व्यापार घाटा १६ खर्ब नाघ्यो

काठमाडौँ। चालु आर्थिक वर्ष २०८२/८३ को पहिलो ११ महिनामा नेपालको आयात र निर्यात दुवैमा वृद्धि भएको छ। भन्सार विभागले सोमबार सार्वजनिक गरेको तथ्याङ्कअनुसार यस अवधिमा आयात १५.१६ प्रतिशतले बढेर १८ खर्ब ९४ अर्ब ९८ करोड ८७ लाख रुपैयाँ पुगेको छ। गत आर्थिक वर्षको सोही अवधिमा आयात १६ खर्ब ४४ अर्ब ७९ करोड ७५ लाख रुपैयाँ रहेको थियो।

यसैगरी, निर्यात पनि १२.२८ प्रतिशतले वृद्धि भई दुई खर्ब ७७ अर्ब ९६ करोड ७२ लाख रुपैयाँ पुगेको छ। अघिल्लो वर्षको सोही अवधिमा निर्यात दुई खर्ब ४७ अर्ब ५७ करोड तीन लाख रुपैयाँ रहेको थियो।

आयातको तुलनामा निर्यात वृद्धि कम भएकाले व्यापार घाटा समेत बढेको छ। ११ महिनामा व्यापार घाटा १५.६७ प्रतिशतले बढेर १६ खर्ब १६ अर्ब १३ करोड १६ लाख रुपैयाँ पुगेको छ। गत वर्ष सोही अवधिमा व्यापार घाटा १३ खर्ब ९७ अर्ब २२ करोड ७३ लाख रुपैयाँ थियो।

आयात र निर्यात दुवै बढेसँगै नेपालको कुल वैदेशिक व्यापार पनि उल्लेखनीय रूपमा विस्तार भएको छ। चालु आर्थिक वर्षको ११ महिनामा कुल वैदेशिक व्यापार १४.७८ प्रतिशतले बढेर २१ खर्ब ७२ अर्ब ६६ करोड १३ लाख रुपैयाँ पुगेको छ, जबकि गत वर्ष सोही अवधिमा यो १८ खर्ब ९२ अर्ब ३६ करोड ७७ लाख रुपैयाँमा सीमित थियो।

भन्सार विभागका अनुसार सबैभन्दा धेरै आयात हुने वस्तुमा पेट्रोलियम पदार्थ अग्रस्थानमा रहेको छ। समीक्षा अवधिमा दुई खर्ब ९७ अर्ब १४ करोड ४४ लाख रुपैयाँ बराबरको पेट्रोलियम पदार्थ आयात भएको छ। त्यस्तै, एक खर्ब १९ अर्ब ६३ करोड २० लाख रुपैयाँ बराबरको भटमासको कच्चा पदार्थ तथा ५५ अर्ब ९३ करोड ३७ लाख रुपैयाँ बराबरको खाद्यान्न आयात गरिएको छ।

निर्याततर्फ भने भटमासको तेल प्रमुख वस्तु बनेको छ। ११ महिनामा एक खर्ब २२ अर्ब ८६ करोड ६३ लाख रुपैयाँ बराबरको भटमासको तेल निर्यात भएको छ। नेपालमा तेस्रो मुलुकबाट भटमासको कच्चा पदार्थ आयात गरी प्रशोधनपछि निर्यात गर्ने अभ्यास रहेको छ।

Comments