विश्वकप: ब्राजिल २-१ ले पराजित, नर्बे क्वार्टरफाइनलमा

breaking news

काठमाडौं । पाँच पटकको विश्व विजेता ब्राजिललाई २–१ ले स्तब्ध पार्दै नर्वे पहिलो पटक फिफा विश्वकप फुटबलको क्वार्टरफाइनलमा पुगेको छ। आज बिहान सम्पन्न रोमाञ्चक प्रतिस्पर्धामा नर्वेका एर्लिङ हालाण्ड नायक बने। उनले खेलको ७९औँ मिनेटमा पहिलो गोल गर्दै टोलीलाई अग्रता दिलाए भने ९०औँ मिनेटमा दोस्रो गोल थप्दै जित सुनिश्चित गरे।

ब्राजिलले खेलमा दुई पटक पेनाल्टीको अवसर पाए पनि पहिलो पेनाल्टी ब्रुनो गिमारेसले सदुपयोग गर्न सकेनन्। अतिरिक्त समयमा नेयमारले पेनाल्टीमार्फत एक गोल फर्काए पनि टोलीलाई हारबाट जोगाउन पर्याप्त भएन।

२८ वर्षपछि विश्वकपमा पुनरागमन गरेको नर्वेले ब्राजिललाई हराउँदै ऐतिहासिक रूपमा पहिलो पटक विश्वकपको अन्तिम आठमा स्थान सुरक्षित गरेको हो। अब नर्वेले क्वार्टरफाइनलमा मेक्सिको र इङ्ग्ल्यान्डबीचको विजेतासँग प्रतिस्पर्धा गर्नेछ।

यता, ब्राजिल भने सन् १९९० पछि पहिलो पटक विश्वकपको क्वार्टरफाइनलअघि नै प्रतियोगिताबाट बाहिरिएको छ। आजको खेलमा दुई गोल गरेका हालाण्ड चार खेलमा सात गोलसहित गोल्डेन बुटको दौडमा फ्रान्सका किलिएन एमबाप्पे र अर्जेन्टिनाका लियोनल मेसीको बराबरीमा पुगेका छन्।