इरानले होर्मुज जलमार्ग बन्द गरेपछि अमेरिका थप आक्रामक

breaking news

काठमाडौं । इरानले स्ट्रेट अफ होर्मुज बन्द गरेपछि विश्वमा थप तनाव बढेको छ । इरानले अर्को सूचना नआएसम्मका लागि विश्वकै सबैभन्दा महत्वपूर्ण समुद्री व्यापारिक मार्गमध्ये एक मानिने स्ट्रेट अफ होर्मुज बन्द गर्ने निर्णय गरेको हो । यो व्यापारिक मार्ग बन्द भएसँगै अमेरिका र इरानबीचको तनाव थप चर्किएको छ। अमेरिकाले इरानमाथि नयाँ चरणको हवाई आक्रमण गरेको जनाएको छ । इरानले त्यसको अझ कडा जवाफ दिने चेतावनी दिएको छ।

अमेरिकी केन्द्रीय कमाण्ड (सेन्टकम) का अनुसार साइप्रसको झण्डा बोकेको एक व्यापारिक जहाजमाथि इरानले आक्रमण गरेपछि यस साताको तेस्रो चरणको सैन्य कारबाही सञ्चालन गरिएको हो।

सेन्टकमले इरानी इस्लामिक रिभोलुसनरी गार्ड कोर्प्स (आईआरजीसी) को मिसाइल आक्रमणबाट जहाजको इन्जिन कक्षमा गम्भीर क्षति पुगेको, जहाज अगाडि बढ्न नसक्ने अवस्थामा पुगेको तथा चालकदलका एक सदस्य बेपत्ता भएको दाबी गरेको छ। अमेरिकी रक्षा मन्त्री पिट हेगसेथले सामाजिक सञ्जाल एक्समार्फत सेन्टकमको विज्ञप्ति साझा गर्दै इरानले गलत निर्णय गरेको र त्यसको मूल्य चुकाउनुपर्ने टिप्पणी गरेका छन्।