सर्वोच्च बारले कानून व्यवसायीसँग माग्यो दश वर्षयताका महत्त्वपूर्ण फैसला

breaking news

काठमाडौं । सर्वोच्च अदालत बार एशोसिएशनले पछिल्लो दश वर्षयताका प्रकाशित तथा अप्रकाशित महत्त्वपूर्ण फैसला उपलब्ध गराउन कानून व्यवसायीहरूलाई आग्रह गरेको छ। एशोसिएशनले २०७२ वैशाख १ गतेदेखि २०८२ चैत मसान्तसम्म सर्वोच्च अदालतबाट भएका महत्त्वपूर्ण फैसलाहरू उपलब्ध गराउन वरिष्ठ अधिवक्ता तथा अधिवक्ताहरूलाई आग्रह गरेको हो।

एशोसिएशन कार्यसमितिको २०८२ भदौ १३ गते बसेको बैठकले बारका पूर्वअध्यक्ष तथा वरिष्ठ अधिवक्ता कोमलप्रकाश घिमिरेको संयोजकत्वमा फैसला अध्ययन समिति गठन गरेको थियो। समितिले संवैधानिक, कर तथा वाणिज्य, बैंकिङ, फौजदारी, देवानी, सार्वजनिक सरोकार, पारिवारिक कानून तथा न्याय प्रशासनसँग सम्बन्धित विषयका मुद्दामा भएका फैसलाहरू अध्ययन गरी एशोसिएशनलाई प्रतिवेदन बुझाउनेछ।

सोही प्रयोजनका लागि कानून व्यवसायीहरूको जानकारीमा रहेका सम्बन्धित फैसलाहरू संकलन गर्न लागिएको एशोसिएशनले जनाएको छ। एशोसिएशनले आगामी भदौ मसान्तभित्र आफूलाई जानकारीमा रहेका महत्त्वपूर्ण फैसलाहरू एशोसिएशनको सचिवालय वा इमेलमार्फत उपलब्ध गराई फैसला अध्ययन कार्यमा सहयोग गर्न कानून व्यवसायीहरूलाई अनुरोध गरेको छ।