सामान्य यात्रु झैं जहाज चढेर अमेरिका गए बालेन, बिदाई गर्ने दुईजना मात्रै

काठमाडौँ । प्रधानमन्त्री बालेन्द्र शाह सामान्य यात्रु झैं जहाज चढेर अमेरिका प्रस्थान गरेका छन् । प्रम शाहलाई बिदाई गर्ने दुईजना मन्त्रीमात्रै देखिए । संयुक्त राष्ट्रसंघ भाग लिन अमेरिका प्रस्थान गर्ने क्रममा प्रधानमन्त्री शाहको अलिकति पनि तामझाम देखिएन । यसअघिका प्रधानमन्त्रीहरु विदेश जाँदा ठूलो रकम खर्च गरेर राष्ट्रको ढुकुटीकाे माया नै नगरी तामझामका साथ जाने गर्थे । अझ आफ्ना नातानाला, आसेपासे पनि लाने गर्थे । तर त्यो प्रथालाई प्रम बालेनले तोड्दै भविष्यमा उनीपछि हुने प्रधानमन्त्रीलाई गतिलो पाठ सिकाइ दिएका छन् ।

‘देशको ढुकुटी मोजमस्ती गरेर सक्नु हुँदैन’ भन्ने भनाईलाई व्यवहारमै कार्यान्वयन गर्न खोज्ने प्रम शाह पहिलो देखिएका छन् । पहिलो विदेश भ्रमणका क्रममा सानो प्रतिनिधिमण्डल लिएर उनी अमेरिका प्रस्थान गरेका हुन् । विदाइका क्रममा एयरपोर्टमा कुनै औपचारिक कार्यक्रम भएन । सेनाले सलामी दिने परम्परा पनि तोडियो । बिदाइका लागि मन्त्री र उच्च पदाधिकारीको लावालश्कर पनि देखिएन । सामान्य मानिसको जस्तै व्यवहारले प्रम शाहको वेट अझ बढाएको छ । आफ्ना समर्थकहरु त छँदैछन्, विरोधी खेमाले पनि मुटु मिचेर प्रशंसा गरेका छन् ।

प्रम बालेनलाई बिदाइ गर्न गएका दुईजना मन्त्री भने आफ्नै हिसाबले एयरपोर्ट पुगेका थिए । गृहमन्त्री सुदन गुरुङ र पर्यटन मन्त्री खडकराज पौडेलले प्रधानमन्त्रीलाई जहाज छेउमा बिदाइ गरेका थिए । प्रधानमन्त्री शाह राष्ट्रिय पोशाकमा पनि देखिएनन् । उनले कोट-पाइन्ट र स्पोर्ट्स सुज लगाएका थिए । प्रधानमन्त्रीका प्रमुख सल्लाहकार कुमार बेन हाफ सर्ट र पेन्ट लगाएर झनै अनौपचारिक लुगामा थिए ।

अरु सबै यात्रुहरु बोर्ड भइसकेपछि मात्रै प्रधानमन्त्री बालुवाटारबाट प्रस्थान गरेका थिए । बिदाई गर्न गएका दुईमन्त्रीसँग कुनै फुलगुच्छा थिएन । प्रधानमन्त्री चढ्नासाथ जहाज उडेको थियो । कार्यवाहक प्रधानमन्त्री स्वर्णिम वाग्लेले प्रधानमन्त्रीलाई कार्यकक्षमा नै विदाइ गरेका थिए ।

Comments