इण्डिया फाउण्डेसनको कार्यक्रममा भाग लिन डा.भट्टराई भारत प्रस्थान

राजनीति

- न्युज–नेपाल संवाददाता

काठमाडौं । नयाँ शक्ति पार्टी नेपालका संयोजक डा. बाबुराम भट्टराई विभिन्न कार्यक्रममा सहभागी हुन भारत प्रस्थान गरेका छन् ।

डा. भट्टराई इण्डिया फाउण्डेसनले आयोजना गरेको ‘काउन्टर टेरोरिज्म कन्फरेन्स १४–१६ मार्च’ मा भाग लिन त्यसतर्फ प्रस्थान गरेका हुन् । डा.भट्टराईले १५ मार्चमा कन्फरेन्सलाई सम्बोधन गर्नेछन् ।

उनले ‘बुलेट टु ब्यालेट’ शीर्षकको विशेष सत्रलाई प्रमुख वक्ताको रुपमा सम्बोधन गर्ने कार्यक्रम रहेको नयाँ शक्तिले जानकारी दिएको छ ।

त्यस्तै १९ मार्चमा उनी नयाँ शक्ति पार्टी, नेपालको प्रवास समितिले गोवामा आयोजना गरेको नेपालीहरुसँगको अन्तरक्रिया तथा भेटघाट कार्यक्रममा सहभागी हुनेछन् । त्यसैगरी उनले २० मार्चमा पार्टीको आयोजनामा हुने दिल्लीमा रहेका नेपालीहरुसँग भेटघाट तथा अन्तरक्रिया गर्नेछन् ।
साथै उनले दिल्लीमा रहँदा भारतका राजनीतिक व्यक्तित्व, नेपाल–भारत सम्बन्धमा जानकार बुद्धिजिवी, नागरिक समाजका अगुवाहरुसँग पनि भेटघाट गर्नेछन् । डा.भट्टराई २१ मार्च विहान नेपाल फर्कनेछन् ।