दार्जिलिङमा नेपालीभाषी आन्दोलित भएपछि सेना परिचालन

विश्व प्रवास

दार्जिलिङ, २६ जेठ । दार्जिलिङमा भाषा विवादले उग्र रुप लिदै गएको छ । एकाएक भाषा विवाद बल्झिएपछि तनावमा फसेको भारतको दार्जिलिङमा सेना परिचालन गरिएको छ । पश्चिम बंगाल राज्य सरकारले राज्यका सबै विद्यालयमा बंगला भाषाको पठनपाठन अनिवार्य गरेपछि दार्जिलिङका नेपालीभाषी आन्दोलनमा उत्रिएका थिए ।

दार्जिलिङको राजभवनमा राज्य सरकारको बैठक चलिरहेकै बेला आन्दोलन चर्किएपछि प्रदर्शन रोक्न र परिस्थिति तनावपूर्ण हुन नदिन सरकारले सेना तैनाथ गरेको छ । परिस्थितिको गाम्भीर्यतालाई ख्यालगरी एक टुकडी सेना तैनाथ गरिएको दार्जिलिङ प्रहरीले जनाएको छ । गोर्खा जनमुक्ति मोर्चाका कार्यकर्ता र सुरक्षाकर्मीबीच बिहीबार दिनभर झडप भएको थियो ।

प्रदर्शनकारी र सुरक्षाकर्मीहरु घाइते हुनुका साथै प्रदर्शनकारीले चारवटा प्रहरी भ्यान र सार्वजनिक यातायातको साधनमा तोडफोड तथा आगजनी भएको थियो । करिब ४५ वर्षपछि पहिलोपटक दार्जिलिङमा राज्य क्याविनेटको बैठक आयोजना गरिएकै बेला प्रदर्शनकारीले मूख्यमन्त्री ममता बनर्जीविरुद्ध नाराबाजी गरेका थिए ।