इटहरीमा साझा पार्टीका उम्मेदवारः मेयरमा डा. तारा काफ्ले, उपमेयरमा प्रकाशचन्द्र परियार

राजनीति

काठमाडौं, २९ जेठ । साझा पार्टीले इटहरी उपमहानगरपालिकाको मेयरमा महिला उम्मेदवार उठाएको छ । काठमाडौं महानगरपालिकामा समेत महिला उम्मेदवारलाई उठाएर सम्मानजनक स्थान पाएको साझा पार्टीले इटहरी उपमहानगरको मेयरमा डा. तारा काफ्लेलाई उम्मेदवार उठाएको छ ।

त्यस्तै पत्रकार तथा समाजसेवी प्रकाशचन्द्र परियारलाई उपमेयरको उम्मेदवार बनाएको छ । इटहरी उपमहानगरपालिका वडा नम्बर ५ निवासी ३८ वर्षीया काफ्लेले जनसंख्या तथा जनस्वास्थ्य विषयमा स्नातकोत्तर र सामुदायिक चिकित्सामा काशी हिन्दु विश्वविद्यालयबाट विद्यावारिधि गरेकी छिन् ।

त्यसैगरी प्रकाशचन्द्र परियार साझा पार्टीको केन्द्रीय संयोजन समितिका सदस्य हुन् । आमसञ्चार विषयमा स्नातकोत्तर गरेका परियाले एक दशकसम्म टेलिभिजन पत्रकारिता गरेका थिए ।

पार्टी निर्माण प्रक्रियाको ६ हप्तामैं काठमाडौं र ललितपुर महानगरपालिकामा उमेदवारी दिएर सम्मानजनक मत ल्याएपछि वैकल्पिक राजनीतिका लागि परिपक्व विकल्पका रूपमा हेरिएको साझा पार्टीले ईटहरीमा समेत आफ्ना सशक्त उम्मेदवार उठाएको हो ।