उत्तर कोरियासँग सम्बन्धविच्छेद गर्न नेपालमाथि जापानको दबाब

विश्व प्रवास

काठमाडौं, २८ असार । उत्तर कोरियासँग सम्बन्धविच्छेद गर्न नेपालमाथि जापानले दबाब दिएको छ । अन्तर्राष्ट्रिय समुदायको आग्रहलाई लत्याउँदै निरन्तर ब्यालेस्टिक मिसाइल परीक्षण गर्दै आएको उत्तर कोरियासँग सम्बन्धविच्छेद गर्न जापानले दबाब दिएको हो । उत्तर कोरियालाई विश्व समुदायबाट एक्ल्याउन जापान नेपालसम्म आइपुगेको छ।

जापानका संसदीय उपविदेश मन्त्री कियोशी ओडाबारा अहिले नेपालमा छन्। उनले मंगलबार राष्ट्रपति विद्यादेवी भण्डारी, प्रधानमन्त्री शेरबहादुर देउवा र परराष्ट्रमन्त्री कृष्णबहादुर महरालाई भेटी एउटै आग्रह गरे, ‘उत्तर कोरियासँगको आवतजावत रोक्नुस्।’ खासगरी उत्तर कोरियासँगको सम्बन्धलाई लिएर जापानीमन्त्रीले प्रधानमन्त्री र परराष्ट्रमन्त्रीसँग कुरा गरेका थिए।

प्रधानमन्त्री देउवासँगको भेटमा उनले स्पष्ट शब्दमा उत्तर कोरियासँगको व्यापार सहयोग रोक्न आग्रह गरेका थिए। त्यतिमात्र होइन, जापानी मन्त्री ओडाबाराले उत्तर कोरियामाथि कडा नीति लिनसमेत सुझाएका थिए।