अमेरिकाको गुआममा चारवटा मिसाइल आक्रमण गर्दै उत्तर कोरिया

विश्व प्रवास

काठमाडौं, २६ साउन । उत्तर कोरियाले अमेरिकाको गुआममा मिसाइल आक्रमणको तयारी गरेको छ । प्रशान्त महासागरको अमेरिकी टापु गुआममा उत्तर कोरियाले ४ वटा मिसाइल आक्रमण गर्ने तयारी अन्तिम चरणमा पुगेको बताएको छ । गुआममा अगस्टको मध्यतिर चारवटा मिसाइल आक्रमण गर्ने तयारी भएको उत्तर कोरियाले दाबी गरेको छ ।

उत्तर कोरियाको सरकारी समाचार संस्था केसिएनएले हवासङ–१२ नामक चारवटा रकेट आक्रमणका लागि तयार रहेको बताएको छ । ती रकेट जापानको जमिन तथा समुद्री क्षेत्रमाथिबाट जाने र गुआम भन्दा ३० किलोमिटर पर समुद्रमा खस्ने केसिएनएलाई उद्धृत गर्दै बिबिसीले जनाएको छ । तर यो आक्रमणका लागि उत्तर कोरियाका नेता किम जोङ–उनले सहमति जनाउनु पर्नेछ । गुआममा अमेरिकी सामरिक बम वर्षक विमानको भण्डारण गरिएको छ ।

यसैबिच अमेरिकाले आफ्नो विनासको बाटो आफै नबनाउन उत्तर कोरियालाई चेतावनी दिएको छ । अमेरिकी रक्षा मन्त्री जिम म्याटिसले उत्तर कोरियाले पछिल्लो समय गरिरहेको गतिविधि उसकै लागि घातक हुन सक्ने भन्दै आफ्नो विनासको निम्तो आफै गरिरहेको बताएका हुन् । उत्तर कोरियाले आक्रमणको तयारी गरिरहेको तथ्य प्रकाशमा आएपछि अमेरिकाले समेत सुरक्षा सतर्कता बढाएको जनाईएको छ ।