निर्माण व्यवसायी गौचन हत्याका ‘सुटर’ पक्राउबारे गृहमन्त्रीले किन ढाँटे ?

काठमाडौं, २५ असोज । सोमबार दिउँसो अज्ञात समूहको गोली लागेर नेपाल निर्माण व्यावसायी महासंघका अध्यक्ष शरदकुमार गौचनको ज्यान गयो । घटना लगत्तै निर्माण व्यवसायी, मृतका आफन्तजनले घटनामा संलगनको पहिचान नगरिए शव नउठाउने चेतावनी दिए ।

उनीहरुको आक्रोसित भनाईलाई मत्थर पार्न गृहमन्त्री जनार्दन शर्माले झुट बोलेको पाईएको छ । घटना भएको एक घण्टामै गृहमन्त्रीले गौचनको हत्यामा संलग्न रहेका आशंकामा तीन जना पक्राउ गरिएको सार्वजनिक गरे । उनले गौचनको हत्यामा संलग्नलाई चाँडै सार्वजनिक गर्ने दाबी पनि गरेका थिए ।

अनामनगरस्थित महासंघको कार्यालय जान सोमबार दिउँसो घरबाट हिँडेका गौचनलाई २ः ४५ बजे मध्यबानेश्वर खरीबोटमा सुटरले गाडिभित्रै गोली हानेर हत्या गरेका थिए । घटनाको करिब एक घन्टापछि मनमैजुमा एउटा पेस्तोल र तीन राउन्ड गोलीसहित तीनजना पक्राउ परेको सूचना सार्वजनिक भएको थियो । छिरिङ तामाङ, सञ्जय तामाङ र दिलीप लामा घटनाको १५ मिनेटपछि पक्राउ परेको दाबी प्रहरीको थियो ।

गृहमन्त्रीको दाबीको आधार पनि घटना भएको समय र प्रहरीले दाबी गरेको पक्राउको समय नै थियो । काभ्रेका ती तीनजनालाई गौचनको हत्याको आधा घन्टाअघि महानगरीय प्रहरी अपराध महाशाखा र महानगरीय प्रहरी परिसर काठमाडौंले पक्राउ गरेका थियो । उनीहरूलाई महाशाखाबाट डिएसपीको कमान्डमा खटिएको टोलीले पक्राउ गरेको थियो ।

घाइते गौचनको गोली लागेर मृत्यु भएपछि निर्माण व्यवसायी आक्रोशित भएका थिए । उनीहरूले घटनामा संलग्नलाई पक्राउ नगरिएसम्म गौचनको शबसमेत नउठाउने चेतावनी दिएपछि तीनजना पक्राउको समय अदलबदल गर्दै हतियारसहित पक्राउ परेको सूचना सार्वजनिक भएको थियो । काठमाडौं प्रहरी परिसरका प्रमुख एसएसपी रवीन्द्र धानुकले महाशाखा र परिसरको टोलीले सोमबार हतियारसहित तीनजना पक्राउको पुष्टि गरे पनि यकिन समय बताउन चाहेनन् । पक्राउ समयबारे जिज्ञासा राख्दा उनले भने, ‘गौचन हत्याको आसपास नै हो । समय यकिन भएन ।’

Comments