सरुवा गर्दा पनि कञ्चनपुर छाड्न नमानेका एसपी प्रकाश चन्द अदालत किन गए ?

प्रदेश

कञ्चनपुर, ३१ असोज । कञ्चनपुरका प्रहरी प्रमुख एसपी प्रकाश चन्द आफ्नै संगठनको निर्णयविरुद्ध अदालतमा मुद्धा हालेका छन् । कञ्चनपुरमा शान्ति सुरक्षा दिन नसकेको भन्दै प्रहरी प्रधान कार्यालयले गरेको सरुवा निर्णयविरुद्ध एसपी चन्दले उच्च अदालत दिपायलमा रिट निवेदन दायर गरेका हुन् ।

चन्द कञ्चनपुर प्रहरी प्रमुख भएर गएपछि पटक पटक विभिन्न विवादमा मुछिएको तथा हत्या घटनामा बढोत्तरी भएको भन्दै गत साता प्रहरी मुख्यालयले सरुवा गरिएको थियो । तर आफ्नै माथिल्लो निकायले गरेको निर्णय विरुद्ध अदालत गएर नेपाल प्रहरीको इतिहासमा पहिलो घटना बनाएका छन् । मुख्यालयले उनको ठाउँमा पठाइएका एसपी डिल्लीराज विष्टलाई खटाएको थियो । उनी हाजिर हुन कञ्चनपुर पुगे । तर, चन्दले ठाउँ नछाडेपछि अहिलेसम्म पदभार ग्रहण गर्न पाएका छैनन् ।

प्रहरी मुख्यालयले निर्वाचन आयोगसंग स्वीकृति लिएर विष्टलाई रमाना समेत दिइसकेको बेला एसपी चन्द भने आचारसंहिता विपरित भएको आफ्नो सरुवा रोकिपाऊ भन्दै अदालत पुगेका हुन् । चन्दले प्रहरी मुख्यालय र मानव स्रोत विकास प्रशासन उपशाखा काठमाडौंलाई विपक्षी बनाएका छन् । उनले आफ्नो सरुवा नियम विपरित भएको भन्दै अन्तरिम आदेशको माग समेत गरेका छन् ।

चन्दको निवेदनमा सुनुवाई गर्दै उच्च अदालत दिपायलका न्यायाधीश वीरेन्द्र कुमार कर्णको एकल इजलासले दुवै पक्षलाई छलफलका लागि कात्तिक ८ गते बोलाउने निर्णय गर्दै हाललाई रमाना नदिन आदेश दिएको छ ।

एसपी चन्दको कार्यक्षमता कमजोर भएको, आर्थिक रुपमा समेत बिवादमा आएको, युवतीकाण्डमा फसेको, पत्रकार थुनेको भन्दै मुख्यालयले उनको सरुवा गरी आगामी मंसिरमा हुने निर्वाचनमा सुरक्षा व्यवस्था चुस्त बनाउने जिम्मासहित एसपी विष्टलाई कञ्चनपुर पठाएको थियो ।

एसपी चन्द अनिवार्य अवकासमा जान ३ महिना मात्रै बाँकी छ । चन्द प्रहरी प्रमुख भएको एक वर्षभन्दा बढीको अवधिमा कञ्चनपुरमा आधा दर्जनभन्दा बढी हत्याका घटना भएका छन् भने शान्ति सुरक्षाको स्थिति पनि खस्किएको छ । साथै अहिलेसम्म कुनै घटनाको अनुसन्धानले ठोस तथ्य भेटाउन समेत सकेको छैन् ।