प्रदेश नम्बर एकमा एमालेसँग सीट बाँडफाँडमा कुरा नमिलेपछि माओवादी काँग्रेसतिर

राजनीति

- न्युज–नेपाल संवाददाता

काठमाडौँ । प्रदेश नम्बर एकमा वाम गठबन्धनबीच सीट संख्यामा कुरा नमिलेपछि माओवादी केन्द्रले नेपाली काँग्रेससँग गोप्य भेटवार्ता गरेको छ । प्रदेशसभा र प्रतिनीधिसभा निर्वाचनमा सीट बाँडफाँडमा कुरा नमिलेपछि वाम गठबन्धनका दुई ठूला पार्टी माओवादी र एमालेबीचको गठबन्धनमा गम्भीर असन्तुष्टि पैदा भएको हो ।

हिजोमात्र कुरा नमिलेपछि माओवादीको प्रदेश नम्बर एकको शीर्षस्त र नेपाली काँग्रेसका नेताबीच गोप्य भेटवार्ता भएको माओवादी एक उच्च स्रोतले न्युज–नेपाललाई जानकारी दियो । एमालेको घमण्डका कारण काँग्रेससँग चुनावी तालमेलबारे व्यापक छलफल अघि बढाइएको छ ।

स्रोत नखुलाउने सर्तमा माओवादीका एक नेताले भने,‘यो ढंगबाट प्रदेश नम्बर १ मा न एमालेसँग तालमेल हुन्छ न एकता नै । तर, काँग्रेससँग तालमेल गर्ने अभ्यास भने भइरहेको छ ।’

प्रदेशसभामाभन्दा विशेष गरेर प्रतिनीधिसभामा सुनसरी–१, भोजपुर, मोरङ्ग–१, ३ र ५ का साथै झापालाई लिएर असन्तुष्टि पैदा भएपछि एमाले वाम एकतामा गम्भीर नदेखिएको आरोप माओवादी नेताहरूले लगाएका छन् ।