प्रत्यक्षतर्फको मतपत्र जिल्लाअनुसार फरक हुने, उम्मेदवार अनुसार मात्र चुनाव चिन्ह

प्रदेश

काठमाडौं, १० कात्तिक । प्रत्यक्षतर्फको मतपत्र जिल्लाअनुसार फरक फरक हुने भएको छ । बदर मत घटाउन भन्दै निर्वाचन आयोगले जिल्लामा उम्मेदवार संख्याको आधारमा मतपत्र छाप्ने तयारी गरिएको छ । मंसिर १० र २१ गते हुने प्रतिनिधिसभा र प्रदेशसभाको प्रत्यक्षतर्फको मतपत्रमा उम्मेदवारी दिएका दलको मात्र चुनाव चिन्ह हुने भएको हो ।

प्रतिनिधिसभा र प्रदेशसभा दुवैको प्रत्यक्षतर्फको मतपत्रमा उम्मेदवारी दिएका दलको मात्र चुनाव चिन्ह राखेर मतपत्र छाप्ने तयारी भईरहेको निर्वाचन आयोगले जनाएको छ । उम्मेदवार नभएका दलको समेत चुनाव चिन्ह राख्दा मतपत्र बदर हुने सक्ने भएकाले आयोगले उम्मेदवारी परेका दलको मात्र चिन्हलाई मतपत्रमा समावेश गर्ने निर्णय गरेको आयोगका प्रवक्ता नवराज ढकालले जानकारी दिए ।

समानुपातिकतर्फको मतपत्र छाप्ने काम सकिएसँगै आयोगले शुक्रबारदेखि प्रत्यक्षतर्फको मतपत्र छाप्ने तयारी गरेको छ । निर्वाचन आयोगको यस्तो निर्णयसँगै गठबन्धन बनाएर चुनावमा होमिएका दलहरुलाई पनि सहज भएको छ । समानुपातिकको मतपत्र भने सबै चुनाव क्षेत्रमा एउटै हुनेछ ।

कस्तो हुनेछः

उदाहरणको लागि रामेछाप जिल्लाको प्रतिनिधिसभाको मतपत्रमा एमालेको चुनाव चिन्ह ‘सूर्य’ हुने छैन भने प्रदेशसभाको दुवै क्षेत्रमा माओवादीको चिन्ह ‘गोलाकारभित्रको हँसिया हथौडा’ राखिने छैन । किनकी वाम गठबन्धनबाट रापेछापको प्रतिनिधिसभामा माओवादीका श्यामकुमार श्रेष्ठको उम्मेदवारी परेको छ । त्यस्तै प्रदेशसभाको क र ख दुवैमा एमालेबाट शान्ति पौडेल र कैलाश ढुंगलेको उम्मेदवारी परेको हुँदा चुनाव चिन्ह ‘सूर्य’ हुनेछ । तर माओवादी केन्द्रबाट उम्मेदवारी नपरेको हुँदा ‘गोलाकारभित्रको हँसिया हथौडा’ हुने छैन ।