सर्वोच्चको सम्मान गर्दै प्रत्यक्षतर्फको मतपत्र छुट्टाछुट्टै छाप्ने आयोगको निर्णय

काठमाडौं, १२ कात्तिक । प्रत्यक्षतर्फको मतपत्र छुट्टाछुट्टै छापिने भएको छ । सर्वोच्च अदालतको आदेशका कारण निर्वाचन आयोगले मंसिरमा हुने प्रतिनिधिसभा र प्रदेशसभा चुनावका लागि प्रत्यक्षतर्फको मतपत्र दुईवटा छाप्ने निर्णय गरेको छ ।

आयोगले एउटै पानामा माथिल्लो भागमा प्रतिनिधिसभा र तल्लोभागमा प्रदेशसभाको मतपत्र छाप्ने तयारी गरे पनि सर्वोच्च अदालतको आदेशपछि अब छुट्टाछुट्टै पानामा मतपत्र छाप्ने निर्णय गरेको हो । उक्त निर्णयले मंसिरको चुनावमा कुनै फरक नपर्ने निर्वाचन आयोगले जनाएको छ । ‘छुट्टछुट्टै पानामा मतपत्र छाप्ने निर्णय आयोगले गरेको छ । चुनाव तोकिएकै मितिमा हुन्छ ।’ आयोगका एक आयुक्तले भने ।

सर्वोच्च अदालतले कात्तिक १ गते प्रत्यक्षतर्फको मतपत्र छुट्टाछुट्टै छाप्ने विषयमा ‘गम्भीरता पूर्वक विचार गर्न’ भने पनि बुधबार छुट्टै मतपत्र छाप्न बाध्य पार्ने गरी प्रगति विवरण मागे पछि आयोग छुट्टाछुट्टै मतपत्र छाप्ने निर्णयमा पुगेको हो ।

सर्वोच्चको आदेशपछि केही दिनदेखि आयोगले यो विषयमा औपचारिक अनऔपचारिक छलफल गर्दै आएको थियो । निर्वाचन आयोगलाई शनिवारमात्रै सर्वोच्चको औपचारिकपत्र पुगेको थियो । आइतबार महान्यायाधिवक्ता कार्यालयसँग थप परामर्श गरेपछि आयोग छुट्टाछुट्टै मतपत्र छाप्ने निर्णयमा पुगेको हो ।

आयोगले चुनावको मिति भने हेरफेर नगर्ने भएको छ । पहिलो चरण मंसिर १० र दोस्रो चरणमा मंसिर २१ गते नै चुनाव गराउन आयोग प्रतिबद्ध रहेको एक आयुक्तको भनाई छ ।

Comments