ढुंगेलपछि अब पालो कांग्रेस नेता मोहम्मद आलमको, देउवाले दिए यस्तो निर्देशन

प्रदेश

काठमाडौं, १५ कात्तिक । यतिबेला नेपाली राजनीतिले नयाँ मोड लिएको छ । मंगलबार माओवादी केन्द्रका नेता बालकृष्ण ढुंगेल पक्राउ परी जेल चलान भएपछि नेपाली राजनीतिले एकाएक नयाँ मोड लिएको हो । ढुंगेललाई पक्राउ गरी जेल चलान भएपछि नेपालको राजनीति दुई धुब्रमा देखिएको छ । सत्तापक्ष एकातिर र माओवादी केन्द्र, नेकपा एमाले लगायतका वामपन्थीहरु अर्कातिर उभिएका हुन् ।

टुट-फुट भएका माओवादीहरुले एउटै स्वरमा सरकारले शान्ति सम्झौता उल्लघंन गरेको प्रतिक्रिया दिएका छन् । उनीहरुले ढुगेंल पक्राउको विरोधमा विभिन्न ठाउँमा प्रदर्शन गरिरहेका छन् । उता निर्वाचनको लागि माओवादीसँग कुम मिलाएको एमालेले यस विषयमा कुनै प्रतिक्रिया दिएको छैन् ।

माओवादीसँग मिल्नुभन्दा पहिले ढुंगेललाई पक्राउ गर्न दवाव दिने एमाले अहिले मौन देखिएको हो । यता नेपाली कांग्रेसले यो विषयलाई अतिरञ्जित नबनाउन सबैमा आग्रह गरेको छ । अदालतले दोषी ठहर गरेको व्यक्तिलाई जेल सजाय भोग्न लगाउनुले शान्तिसम्झौता भंग नहुने जिकिर कांग्रेसको छ ।

ढुंगेलपछि अब पालो मोहम्मद अफ्ताव आलमकोः
प्रधानमन्त्री शेरबहादुर देउवाले आफ्नै दलका नेता मोहम्मद अफ्ताव आलमलाई पनि कारबाही गर्न नेपाल प्रहरीलाई निर्देशन दिएका छन् । माओवादी केन्द्रका नेता बालकृष्ण ढुंगेललाई पक्राउ गरेर प्रहरीले मंगलबार जेल चलान गरेको अर्को दिन देउवाले कानून उल्लंघन गर्ने कसैलाई पनि छुट नहुने बताएका हुन् ।

‘प्रधानमन्त्री शेरबहादुर देउवाज्यूले मोहम्मद अफ्ताव आलमलाई पनि कारबाही गर्नुस् भनेर प्रहरी प्रमुखलाई निर्देशन दिनुभएको छ’, कांग्रेस निकट स्रोतले भन्यो, ‘कानूनभन्दा माथि कोही पनि छैन ।’ कांग्रेसका नेता मोहम्मद अफ्ताव आलमलाई रौतहट जिल्लामा २३ जनालाई सामूहिक रुपमा हत्या गरेको आरोप छ ।

प्रहरीले त्यस बेला आलमविरुद्धको उजुरी लिन मानेको थिए । पीडितको उजुरीमा सर्वोच्च अदालतले आलमलाई कारबाही गर्न आदेश दिएको थियो । आलम अहिले पनि खुलारुपमा राजनीति गर्दै आएका छन् । रौतहटमा बुथ क्याप्चर गर्ने बेला आलमले बम विष्फोट गराएको त्यस क्रममा घाइते भएकाहरूलाई नजिकैको इटाभट्टमा लगेर हत्या गरेको बताइएको छ ।