८८ किलो सुनकाण्ड: ११ आरोपीविरुद्ध साढे ४३ करोडको बिगो माग गर्दै मुद्दा दायर

अर्थ र बाणिज्य

काठमाडौं, १७ कात्तिक । प्रहीले ८८ किलो सुन तस्करी प्रकरणमा ११ जनाविरुद्ध मुद्दा दायर गरेको छ । सुन तस्करी प्रकरणमा संलग्न भनिएका ११ जनाविरुद्ध महानगरीय प्रहरी परिसरको अपराध अनुसनधान तथा कारवाही शाखाले शुक्रबार काठमाडौं जिल्ला अदालतमा मुद्दा दायर गरेको हो ।

अबैध सुन प्रकरणका अभियुक्तविरुद्ध ४३ करोड ५६ हजार रुपैयाँ बिगो दाबी गरिएको छ । महानगरीय अपराध महाशाखाले गत १९ भदौमा केरुङ नाका हुँदै भित्रिएको ८८ किलो सुन ठमेलबाट बरामद गरेको थियो । संगठित अपराध ऐनअनुसार उनीहरूविरुद्ध मुद्दा दायर गरिएको परिसरले जनाएको छ । अभियुक्तविरुद्ध संगठित अपराध ऐनअनुसार ५ वर्षसम्मको कैद सजाय माग गरिएको छ ।

शुभरत्न शाक्य, गणेशदत्त बडु, सत्यनारायाण अग्रवाल, नन्दकुमार पाण्डुरंग मगर्ले, उल्लाहास दिनकर लालुङ्गे, मानबहादुर तामाङ र ल्याक्पा ग्याल्जोङविरुद्ध मुद्दा दायर गरिएको छ । त्यस्तै, चिनियाँ नागरीक याङ वे मिङ, पान वे मिङ, झाङ होङ लियाङ र हिसे साङ्बो लामाविरुद्ध पनि परिसरले मुद्दा दायर गरेको छ । यी चार जना भने फरार छन् ।

तीन जना ड्राइभरलाई भने परिसरले निर्दोष ठहर्‍याएको छ । अन्य चार जना चिनियाँको भने परिचय खुल्न सकेको छैन । पहिचान खुलेपछि उनीहरूविरुद्ध पनि मुद्दा चलाइने परिसरले जनाएको छ ।