बहालवाला मन्त्रीहरुको हालतः सात मन्त्री पराजित, प्रधानमन्त्रीसहित पाँच मन्त्री विजयी

काठमाडौं, २४ मंसिर । बहालवाला सात मन्त्रीलाई जनताले राम्रैसंग पाठ सिकाएकार पठाएका छन् । प्रतिनिधि तथा प्रदेश सभा निर्वाचनको परिणाम आउँदै गर्दा बहालवाला आठ मन्त्रीले पराजय भोग्नु परेको छ । मंसिर १० र २१ गते गरी दुई चरणमा सम्पन्न निर्वाचनको मतपरिणाम आउँदै गर्दा अहिलेसम्म ८ बहालवाला मन्त्रीले पराजय भोग्नुपरेको छ । त्यसैगरी प्रधानमन्त्री शेरबहादुर देउवासहित पाँच मन्त्री भने विजयी भएका छन्।

उपप्रधानमन्त्री तथा ऊर्जा मन्त्री कमल थापा मकवानपुर १ बाट पराजित भएका छन्। त्यसैगरी स्वास्थ्य मन्त्री दीपक बोहोरा र उद्योग मन्त्री सुनीलबहादुर थापा पनि पराजित भएका छन्। त्यसैगरी सूचना तथा सञ्चारमन्त्री मोहनबहादुर बस्नेतलाई पूर्व सञ्चारमन्त्री अग्नि सापकोटाले पराजित गरेका छन् । बस्नेत कांग्रेसका तर्फबाट लोकतान्त्रिक गठबन्धनका उम्मेदवार थिए।

त्यस्तै सहकारी तथा गरिबी निवारण मन्त्री अम्बिका बस्नेत र कानुन न्याय तथा संसदीय मामिला मन्त्री यज्ञबहादुर थापा पराजित पनि भएका छन्। कांग्रेसका प्रमुख नेताहरुले पराजय भोगिरहनुपर्दा डडेलधुराबाट प्रधानमन्त्री शेरबहादुर देउवाले भने निर्वाचित भएका छन् । २०४६ सालको परिवर्तनपछिका हरेक चुनाव जित्ने कीर्तिमान कायमै राखेका देउवा यो पटक पनि माओवादी केन्द्रका खगराज भट्टलाई पराजित गर्दै विजयी भएका हुन् ।

उपप्रधानमन्त्री तथा बिना विभागीय मन्त्री कृष्णबहादुर महरा, मन्त्री जनार्दन शर्मा विजयी भएका छन्। दुवै सरकारमा रहेर पनि वाम गठबन्धनका उम्मेदवार बनेका थिए। त्यसैगरी रक्षामन्त्री भीमसेनदास प्रधान र युवा तथा खेलकुद मन्त्री राजेन्द्रकुमार केसी पनि काठमाडौँबाट विजयी भएका छन्। दुवै नेपाली कांग्रेसका तर्फबाट उम्मेदवार थिए।

सरकारका चार उपप्रधानमन्त्री मध्ये विजयकुमार गच्छदारले अग्रता कायम गर्न सकिरहेका छैनन् भने शिक्षा मन्त्री गोपालमान श्रेष्ठको स्याङजामा विवादका कारण मतगणना हुन सकेको छैन।

Comments