सरकारबाट बाहिरिने तयारीमा रहेको कांग्रेसले आकस्मिक रुपमा किन बोलायो केन्द्रीय समिति बैठक ?

प्रदेश

काठमाडौं, २६ माघ । नेपाली कांग्रेसले आज केन्द्रीय कार्य समितिको आकस्मिक बैठक बोलाएको छ । सरकारबाट बाहिरिने तयारीमा रहेको कांग्रेसले आकस्मिक रुपमा केन्द्रीय समितिको बैठक बोलाएको हो । बैठक बिहान ९ बजेपछि प्रधानमन्त्रीको सरकारी निवास बालुवाटारमा बस्ने छ ।

प्रदेशसभा गठन र सन्चालन सम्वन्धी विधान बैठकको एजेण्डा रहेको प्रधानमन्त्री शेरबहादुर देउवाका स्वकीय सचिव भानु देउवाले जानकारी दिए । ‘संसदीय दलको विधानको विषयमा छलफल गर्न भनेर बैठक बस्न लागेको हो,’ उनले भने ।

बैठकमा डा. मिनेन्द्र रिजालले विधानको मस्यौदा प्रस्तुत गर्ने र त्यसलाई छलफल गरी पारित गर्ने कार्यतालिका रहेको छ । बैठकमा नयाँ सरकार गठन, प्रतिनिधिसभाको समानुपातिक, सिट बाँडफाट, प्रदेश सरकारका पदहरुमा उम्मेदवारीलगायतका विषयमा समेत छलफल हुने बताईएको छ ।

राष्ट्रियसभा निर्वाचनको परिणामसमेत आइसकेकाले अब नयाँ सरकार गठनको बाटो खुलेकाले सरकारबाट राजीनामा दिने कि नदिने भन्ने विषयमा पनि छलफल हुने अनुमान छ । कतिपय कांग्रेस नेताहरुले भने सरकार कामचलाउ भइसकेकाले प्रधानमन्त्रीले राजीनामा दिइराख्नु नपर्ने बताउँछन् ।