सुधीर बस्नेतलाई पुनः पक्राउ गर्न पीडितको माग

प्रदेश

काठमाडौं,२७ जेठ। ओरियण्टल सहकारीका सञ्चालक सुधीर बस्नेत रिहा भएका भएसँगै बस्नेतबाट ठगिएका पीडितहरुले उनलाई पुनः पक्राउ गर्न माग गरेका छन् ।

राजनीतिको आडमा बस्नेतको रिहाइ भएको पिडितले गुनासो गरेपछि गृहमन्त्री रामबहादुर थापा बादलले भने, ‘म अन्यायमा परेकाहरुलाई न्याय दिनका लागि नै यो कुर्सीमा बसेको हुँ, ‘तपाईरुमाथि अन्याय परेको रहेछ, म यसबारेमा बुझ्छु ।’

विगत ६ वर्षदेखि ठगी धन्दा गर्दै आएका बस्नेतलाई देशको कुनै पनि कानुनले सजायँ दिन नसकेको र आफूहरुले गणतन्त्र आएको महसुस गर्न नसकेको पीडितहरुले गृहमन्त्रीसँग गुनासो पोखेका छन् ।साथै पीडितहरुले बस्नेत देशकै ठूलो अपराधी भएकाले उनलाई पुनः गिरफ्तार गर्न गृहमन्त्री थापासँग माग गरेका छन् ।

काठमाण्डौंको मैतीदेवीमा प्रधान कार्यालय रहेको बस्नेतको सहकारीले ०६९ साल भदौदेखि ११ हजारभन्दा बढी वचत तथा निक्षेपकर्ताहरुबाट उठाएको ४ अर्ब रुपैयाँको साँवा–व्याज फिर्ता दिन नसकेपछि उनी जेल परेका थिए ।