नेपाल ल क्याम्पसमा सबै विद्यार्थीले पढ्न पाउने

राजनीति

काठमाडाैं १६, असार । नेपाल ल क्याम्पसमा तीन वर्षे एलएलबी कानुन बिषयको पढाई सवैका लागि खुल्ला गरिएको छ ।

यसअघि ल क्याम्पसमा कोटा निर्धारण गरेर ८ सय जना बिद्यार्थी भर्ना गर्न भन्दै प्रशासनले प्रवेश परिक्षा लिइएको थियो । तर, ८ सय जनाका लागि क्याम्पसले लिएको प्रवेश परीक्षामा ४ हजार ८ सय विद्यार्थीहरु सहभागी भएका थिए ।

तर संयुक्त विद्यार्थी संगठनको दबावमा कोटा निर्धारण नगर्ने र प्रक्रिया पुर्याएर सबै विद्यार्थीहरुलाई भर्ना लिन क्याम्पस प्रशासन सहमत भएको छ । एलएसबी पढ्न इच्छुक विद्यार्थीहरु २१ गतेदेखि भर्ना हुन सक्ने छन् ।

अखिल क्रान्तिकारीका अध्यक्ष रञ्जित तामाङले भने, ‘कानुनको अध्ययन गर्न पाउने हक सबैलाई छ । संघीयता कार्यान्वयन भएपछि कानुन अध्ययन गरेको जनशक्ति झन् धेरै आवश्यक छ । त्यसैले कोटा तोकिनु गलत छ भनेर हामीले विरोध गर्दै आएका थियौं । अब कलेज पनि पढ्न इच्छुक सबैलाई भर्ना लिन सहमत भएको छ ।’

कुनै पनि विषयमा स्नातक उत्तिर्ण विद्यार्थीहरुले एलएलबी स्नातक तह अध्ययन गर्न पाउँछन् । एलएलबी अध्ययनका लागि प्रमुख आकर्षणको कलेज त्रिभुवन विश्विद्यालयको नेपाल ल क्याम्पस हो । यस कलेजले सीमित संख्यामा मात्र विद्यार्थी भर्ना लिने निर्णय गर्दा बाँकी विद्यार्थीहरुलाई निजी कलेजमा महंगो शुल्क बुझाएर भर्ना हुनुपर्ने बाध्यता थियो ।

‘विगतमा डिन कार्यालयसँग पनि हाम्रो सिट सीमित नगर्ने सहमति भएको थियो । अहिले ल क्याम्पसमा तीन वर्षे एलएलबीको सवालमा पनि कोटा नतोक्ने सहमति भएको छ । यसलाई संयुक्त विद्यार्थी आन्दोलनको थप उपलब्धिको रुपमा लिएका छौं,’ तामाङले भने ।