सलाम एयरले आजदेखि ओमन–काठमाडौँ सिधा उडान सुरु

काठमाडौं २६,भदाै । सलाम एयरले सोमबारबाट  काठमाडौँ-मस्कट रुटमा नियमित उडान सुरु गरेको गरेको छ। यस एयरलाइन्सको जनरल सेल्स एजेन्ट (जिएसए) आइएमई इन्टरनेशनल ट्राभलले गर्नेछ। आइएमई ट्राभल आइएमई ग्रुपद्वारा प्रवर्द्धित संस्था हो।

काठमाडौंमा-मस्कट रुटमा एकतर्फी भाडा १६ हजार रुपैयाँ तोकिएको छ।

वैदेशिक रोजगारीमा गएका नेपाली युवालाई लक्षित गर्दै कम्पनीले सुपथ मूल्यमा टिकट दर लागू गरेको आइएमइ ग्रुपका अध्यक्ष चन्द्रप्रसाद ढकालले जानकारी दिए।

‘नेपाल पर्यटन वर्ष २०२० लाई सफल बनाउनका साथै विदेशमा कार्यरत नेपालीलाई सुपथ मूल्यमा हवाई सुविधा दिने उद्देश्यले हामीले ओमानको बजेट एयरलाइन्स सलाम एयरसँग सहकार्य गरेका हौँ,’ ढकालले भने।

मध्यपूर्वी मुलुकमा रहेका नेपालीले आवतजावतका लागि सम्पर्क गर्न सुरु गरिसकेको उनले जानकारी दिए।

कम्पनीले निकट भविष्यमा आन्तरिक र वाह्य क्षेत्रको उडान विस्तार गर्दै लाइट, फ्रेन्ड्ली र फ्लेक्सी गरी तीन प्रकारका हवाई शुल्क निर्धारण गर्ने योजना रहेको ढकालले बताए। कुनै पनि गन्तब्यमा १० पटक यात्रा गर्ने यात्रुले कम्पनीको एउटा हवाई टिकट निशुल्क पाउने योजना ल्याएको पनि कम्पनीले जानकारी दिएको छ।

कम्पनीका अनुसार आइएमई ग्रुपद्वारा सञ्चालित थानकोटस्थित चन्द्रागीरी हिल्समा सलाम एयरबाट आउने सबै ग्राहकले २५ प्रतिशत छुट पाउन सक्नेछन् भने पहिलोपटक ओमानबाट नेपाल आउने यात्रुले उपहार स्वरुप ५० प्रतिशत छुट पाउन सक्नेछन्। यसका लागि यात्रुले चन्द्रागिरी हिल्सको काउन्टरमा एयरलाइन्सको बोर्डिङ पास अनिवार्य देखाउनुपर्ने प्रावधान रहेको छ।

‘आजबाट सलाम एयरमार्फत नेपालमा नियमित उडान सुरु गर्न पाउँदा खुसी लागेको छ। अहिले हामीसँग एक सय ७४ सिटे पाँचवटा न्यारोबडी जहाज छन्। अर्को वर्ष पाँचवटा थप्दै निकट भविष्यमा २० वटा जहाज थप्ने योजना बनाएका छौँ,’ सलाम एयरका प्रमुख कार्यकारी अधिकृत क्याप्टेन महम्मद अहमदले भने, ‘ओमन-नेपालमा नियमित उडान सञ्चालनसँगै दुइतर्फी पर्यटन प्रवर्द्धन गर्ने हाम्रो मुख्य उद्देश्य छ।’

सलाम एयरका लागि त्रिभुवन अन्तर्रराष्ट्रिय विमानस्थलले विहान ८:०० बजेदेखि  ८:४० बजेसम्मको स्लट दिएको विमानस्थलका महाप्रबन्धक राजकुमार क्षेत्रीले बताए।

कम्पनीले सातवटा गन्तब्यमा साप्ताहिक १ सय १६ वटा उडान भर्दै आएको छ। कम्पनीका अनुसार हालसम्म चार लाख यात्रुले सेवा लिइसकेका छन्। कम्पनीले हाल १ सय ७४ सीटयुक्त एयरबस ए ३२० मार्फत उडान गर्दै आएको छ।

Comments