चीनबाट फर्किए सभामुख महरा, भ्रमण उपलब्धिमूलक

काठमाडौं २७,भदाै । प्रतिनिधिसभाका सभामुख कृष्णबहादुर महराले आफ्नो चीनको स्वशासित क्षेत्र तिब्बत भ्रमण फलदायी रहेको बताएका छन् ।

चीनको स्वशासित क्षेत्र तिब्बतको ५ दिने औंपचारिक भ्रमण पूरा गरी बुधबार स्वदेश फर्किएका उनले त्रिभुवन अन्तराष्ट्रिय विमानस्थलमा सञ्चारकर्मीमाझ आफ्नो तिब्बत भ्रमण फलदायी र निकै उपलब्धिमूलक रहेकोे बताएका हुन् ।
उनले आफ्नो तीब्बत भ्रमणले नेपाल–चीनबीचको सम्बन्ध अझै सुदृढ बनाउने विश्वास पनि व्यक्त गरे ।

सभामुख महराले तातोपानी नाका छिट्टै खुलाउने गरी चीनले आन्तरिक तयारी गरिरहेको पनि बताए ।
तिब्बत सरकारका प्रमुखसँगको भेटमा तातोपानी नाका खुलाउने विषयमा पनि छलफल भएको र छिट्टै खुलाउने गरी आन्तरिक तयारीको कामलाई अघि बढाइएको तिब्बत सरकारले जानकारी दिएको सभामुख महराको भनाई छ ।
सभामुख महराले तातोपानी नाका खुलाउन तत्कालका लागि तातोपानी नाकामा अस्थायी पूलको व्यवस्था भईरहेको पनि जानकारी दिए ।

गत शुक्रबार नेपाली प्रतिनिधि मण्डलको नेतृत्व गर्दै तिब्बत प्रस्थान गरेका सभामुख महराले त्यहाँ आयोजित ‘चौंथो चीन–तिब्बत पर्यटन तथा सांस्कृतिक प्रर्दशनी’ को उद्घाटन समारोहमा भाग लिएका थिए ।
त्यसैगरी उनले तिब्बत बसाईको क्रममा तिब्बत सरकारका प्रमुखसँग द्धिपक्षीय हितका विषयमा छलफल गरेका थिए ।
सभामुख महराले सोही भ्रमणको क्रममा ल्हासास्थित नेपाली कन्सुलर कार्यालयको शिलान्यास पनि गरे ।
भवन पूरानो भएकाले नयाँ भवन निर्माणको शिलान्यासको कार्यक्रममा पनि आफू सहभागी भएको सभामुख महराले जानकारी दिए ।
यसैगरी सभामुख महराले सोही कन्सुलर भवनबाट तातोपानी र रसुवागढीमा निर्माण गर्न लागिएको चीन– नेपाल नाका पुलको पनि शिलान्यास गरेका थिए ।
उनले ‘ट्रान्स हिमालय बेल्ट एण्ड रोड इन्टरनेशनल कोअपरेशन फोरम’ को बैठकलाई पनि सम्बोधन गरेका थिए ।

सभामुख महराको भ्रमण टोलीमा नेपाल कम्युनिष्ट पार्टी (नेकपा) की सांसद शान्तिमाया तामाङ, नेपाली काँग्रेसकी सांसद रङमति शाही, संघीय समाजवादी फोरम, नेपालकी उमाशंकर अरबरिया, राष्ट्रिय जनता पार्टी नेपालकी एकवल मियाँ र राष्ट्रिय जनमोर्चाकी सांसद दुर्गा पौडेल सहभागी भएका थिए ।

Comments