को हुन पूर्व शिक्षा मन्त्री धनिराम पाैडेल ?

काठमाडौ । धनिराम पौडेल अर्थात डिआर पौडेल कम्युनिष्ट आन्दोलनका एक सच्चा इमान्दार नेता मानिन्थे ।

बुवा हरिप्रसाद पौडेल र आमा हिमादेवी पौडेलको कोखबाट २०२२ साल कार्तिक ४ गते तत्कालीन दरौ गाविस कुन्चेवारी स्याङ्जामा जन्मिएका पौडेल २०३७ सालदेखी वामपन्थी राजनीतिमा सक्रिय हुँदै आएका थिए ।

मोहन विक्रम सिंह र निर्मल लामाहरुले नेतृत्व गरेको नेकपा (चौथो महाधिवेशन) को विद्यार्थी संगठनको कार्यकर्ता हुँदै २०३९ सालमा विद्यार्थी संगठनको चितवन जिल्ला सदस्य, २०४१ मा केन्द्रिय सदस्य र २०५१ मा नेकपा एकता केन्द्र विभाजनपछी अनेरास्ववियु (क्रान्तिकारी)को केन्द्रिय संयोजक चुनिएका थिए ।

२०४२ सालमा नेकपा (चौम) को सदस्यता लिएका उनले २०४४ सालमा पार्टीको चितवन जिल्ला सदस्यमा चयन भएका थिए । २०४७ सालमा माडीको सितलपुरमा भएको एकता महाधिवेशनका प्रतिनिधि समेत रहेका उनी अखिल नेपाल जनवादी युवा लिगका संस्थापक केन्द्रीय सदस्य समेत थिए । २०५१ को पार्टी विभाजन पछि निर्मल लामा र नारायणकाजी श्रेष्ठलाई साथ दिएका पौडेलले त्यस यता लगातार पार्टीको केन्द्रीय समितिमा रहँदै आएका थिए ।

तात्कालिन नेकपा (एकताकेन्द्र मसाल) र तात्कालिन नेकपा (माओवादी)सँग एकीकरण भएपछि बनेको एकीकृत नेकपा (माओवादी)को केन्द्रीय सदस्य भएका थिए भने, पछि पोलिट्व्युरो सदस्यको जिम्मेवारीमा पार्टी संगठनमा पुर्व, मध्य र पश्चिम नेपालमा काम गरेको अनुभव संगाल्दै दोस्रो संविधानसभामा सभासद र शिक्षामन्त्रीको जिम्मेवारी कुशलतापूर्वक सम्पन्न गरेका थिए ।

उनले त्रिभुवन विश्वविद्यालयवाट स्नातक, शहीद स्मृति क्याम्पस चितवनवाट आईए र माडी माविवाट एसएलसी पास गरेका थिए ।

प्रचण्ड प्रधानमन्त्री बनेका बेला शिक्षा मन्त्री बनेका उनले शिक्षा नियमावली सुधार र सुदृढ बनाएर नेपालको शिक्षा प्रणाली नै सुधार गर्ने अभियानमा जुटेका थिए ।

तत्कालीन एमाओवादीका अध्यक्ष प्रचण्ड चित्वनवाट उम्मेदवार बन्नेभएपछी उनले उम्मेदवारी नै नदिएर प्रचण्डलाई निर्वाचन जिताउन लागिपरेका थिए ।

तर, पौडेल चितवन मै रहेका बेला हृदयघात भएर ज्यान गुमाउन पुगेका छन् । पौडेलको निधनप्रति दुख व्यक्त गर्दै प्रचण्डले मर्माहत बनेको जनाएका छन् ।

यस्तै नेकपा माडी नगरपालिका नगर कर्यालयको आकस्मिक बैठकले दुख व्यक्त गरेको छ भने आज ११ बजे नै नेकपा अध्यक्ष प्रचण्ड प्रवक्ता नारायणकाजी श्रेष्ठ लगाएतको नेताहरुको टोली चितवन प्रस्थान गर्ने भएको छ ।

प्रचण्डका समेत विश्वासपात्र मानिने पौडेल युवा वर्गमाझ लोकप्रिय थिए भने उनको परिवारमा २ छोरी र श्रीमती रहेका छन् । यद्यपि उनी नेकपा प्रवक्ता श्रेष्ठका अत्यन्तै महत्वपूर्ण विश्वासपात्रका रुपमा चिनिन्थे ।

Comments