मौरिससका तर्फबाट नेपालको वाणिज्यदूतमा ईप्पानका उपाध्यक्ष तथा जलविद्युत् उद्यमी कार्की नियुक्त

विश्व प्रवास

- न्युज-नेपाल

काठमाडौं । स्वतन्त्र ऊर्जा उत्पादक संघ, नेपाल (ईप्पान) का उपाध्यक्ष तथा जलविद्युत् उद्यमी गणेश कार्की गणतन्त्र मौरिससका तर्फबाट नेपालका लागि वाणिज्यदूत नियुक्त भएका छन् ।

नेपाल तथा मौरिससको मन्त्रिपरिषद्को निर्णय अनुसार कार्कीलाई वाणिज्यदूत नियुक्त गरिएको हो ।

मौरिससले पठाएको पत्रको आधारमा नेपालस्थित परराष्ट्र मन्त्रालयले कार्कीलाई बिहीबार (भदौ ४ गते) देखि काम सुरु गर्न भन्दै नियुक्तिपत्र दिएको छ ।

उनको कन्सुलर क्षेत्र २०८१ भदौ ३ गते (सन् २०२४ अगष्ट १९) सम्म काठमाडौं उपत्यका (काठमाडौं, ललितपुर र भक्तपुर) कायम रहने उल्लेख छ ।

परराष्ट्र मन्त्री प्रदिपकुमार ज्ञवालीले हस्ताक्षर गरेको नियुक्तिपत्रमा भनिएको छ– गणतन्त्र मौरिससका राष्ट्रपति महामहिम पृथ्वीराजसिं रुपुनद्वारा जारी मिति ४ जुन, २०२० को समादेश पत्रमार्फत काठमाडौं उपत्यकामा अवस्थित हुने गरी श्री गणेश कार्कीलाई अवैतनिक वाणिज्यदूत सम्बन्धी नियमावली, २०३९ बमोजिम मौरिससको अवैतनिक वाणिज्यदूत पदमा स्वीकार गर्दै नेपाल सरकारको तर्फबाट यो अनुमति जारी गर्दछु ।

अवैतनिक वाणिज्यदुत सम्बन्धी नियमावली, २)३९ को नियम १३ अनुसार आफ्नो कार्यालयमा तथा तोकिएको अवस्थामा सवारी साधनमा सम्बन्धित मुलुकको झण्डा प्रयोग गर्ने एवं लेखापढी तथा मनसुलर मामिलामा प्रतिनिधित्व गर्ने अधिकार रहने र भन्सार सहुलियत एवं अन्य देवानी, फौजदारी तथा प्रशासनिक मामिलाका हकमा नेपाली नागरिकहरू सरह नै व्यवहार हुने नियुक्तिपत्रमा उल्लेख छ ।

पत्रमा भनिएको छ– कार्कीलाई उल्लेखित क्षेत्रभर आफ्नो कन्सुलर कार्य समपादन गर्न तथा तत् प्रकारका अधिकारीहरूलाई प्रचलित नेपाल कानुन अनुरूप सुविधा उपभोग गर्नसमेत नेपाल सरकार स्वीकार गर्दछ । आफूले नेपाल र मौरिससबीच व्यापार विस्तार, पर्यटन प्रवर्द्धन तथा दूतावासको भूमिका समेत निर्वाह गर्ने कार्कीले बताए ।

‘नेपालमा मौरिससको दूतावास छैन, त्यसले गर्नुपर्ने काम तथा सहजीकरण गर्न मैले पहल गर्नेछु,’ उनले शुक्रबार ऊर्जा खबरसँग भने, ‘अधिकांश जनसंख्या हिन्दू रहेको अफ्रिकी मुलुक मौरिसस पर्यटनका लागि आकर्षक ठाउँ हो । त्यहाँबाट नेपालमा पर्यटन भित्र्याउनका लागि पनि मैले सक्दो प्रयास गर्नेछु ।

पछिल्लो दशक कार्की जलविद्युत् व्यवसायमा सफल नाम हो । उनको लगानी रहेका वा उनी संलग्न आधा दर्जन आयोजनाबाट विद्युत् उत्पादन भइसकेको छ । त्यति नै आयोजना निर्माणाधीन छन् । उनको लगानी रहेको दोलखामा निर्माण भएको २५ मेगावाटको सिंगटीबाट परीक्षण उत्पादन भइसकेको छ ।