उपत्यकामा एकीकृत क्वारेन्टाइन व्यवस्थापनको तयारी

बागमती प्रदेश

- न्युज-नेपाल

काठमाडौं । कोरोना भाइरस (कोभिड–१९) संक्रमण नियन्त्रणका लागि सरकारले उपत्यकामा एकीकृत क्वारेन्टाइन सञ्चालनको तयारी गरेको छ ।

बिहीबार एकीकृत क्वारेन्टाइन सञ्चालन तथा व्यवस्थापनका विषयमा कोभिड क्राइसिस म्यानेजमेन्ट सेन्टर (सीसीएमसी)का संयोजक उपप्रधानमन्त्री तथा रक्षामन्त्रीसहितका उच्च अधिकारीले छलफल भएको हो ।

रक्षामन्त्रीको निजी सचिवालयका अनुसार उपत्यकामा एकीकृत क्वारेन्टाइनको सञ्चालन तथा व्यवस्थापनकाका निम्ति स्वास्थ्यमन्त्री भानुभक्त ढकाल, गृह र स्वास्थ्य सचिवसँगै उपत्यकाका मेयरसँग छलफल भएको हो ।

पछिल्ला दिनमा काठमाडौं उपत्यकामा कोरोना संक्रमितको संख्या ह्वात्तै बढेको छ । बुधबार मात्र उपत्यकामा ३०१ जनामा संक्रमण पुष्टि भएको छ । बुधबार १३ हजारको पीसीआर परीक्षण ८८५ संक्रमित हुँदा उपत्यकामा तीन सय नाघेको हो । उपत्यकामा सोमबार २२४ जना र मंगलबार २३२ जनामा कोरोना संक्रमण पुष्टि भएको थियो।

नेपालमा अहिले १४ हजार ७३९ जना आइसोलेसनमा रहेका छन्। जसममध्ये ६ हजार २८ जना होम आइसोलेसनमा छन् भने ८ हजार ७११ जना संस्थागत आइसोलेसनमा छन्।

स्वास्थ्य मन्त्रालयका अनुसार पाँचवटा जिल्लामा ५ सय बढी संक्रमित रहेका छन्। मोरङ, पर्सा, बारा सर्लाही, रौतहट, महोत्तरी र काठमाडौंमा ५ सय बढी संक्रमित छन्। प्रवक्ता गौतमका अनुसार मुस्ताङ र हुम्ला संक्रमणमुक्त रहेका छन्।

यस्तै १५१ जनाको आइसीयूमा उपचार भइरहेको छ भने १४ जनाको भेन्टिलेटरमा छन्। नेपालमा कोरोनाबाट १७५ जनाको मृत्यु भएको मन्त्रालयले पुष्टि गरेको छ। बिहीबार मात्र थप ८ जनाको कोरोनाले मृत्यु भइसकेको छ । मन्त्रालयले पुष्टि गर्न बाँकी भए पनि कोरोनाले ज्यान गुमाउनेको संख्या १८३ पुगेको छ ।