वायुसेवा सञ्चालक संघको अध्यक्षमा थापा महासचिवमा कार्की

समाचार

- न्युज नेपाल

काठमाडौं । वायुसेवा सञ्चालक संघ, नेपाल (एओएएन)को २१औं वार्षिक साधारण सभाले संघको अध्यक्षमा क्याप्टेन रामेश्वर थापालाई पुनः चयन गरेको छ। निजी क्षेत्रका वायुसेवा कम्पनीहरूको छाता संगठन एओएएनको शुक्रबार राजधानीमा सम्पन्न सभाले क्याप्टेन थापालाई निर्विरोध पुनः चयन गरेको हो। क्याप्टेन थापा नेपाली हवाई क्षेत्रमा विगत दुई दशकदेखि हेलिकोप्टर कम्पनी सञ्चालन गर्दै आएका छ। थापा सन् २००२ देखि हेलिकोप्टर प्रशिक्षक पाइलटका रुपमा पनि क्रियाशील छन्। हालः उनी सिम्रक एयरका सञ्चालक हुन्।

थापाको नेतृत्वमा दुई वर्षका लागि एओएएनको १३ सदस्यीय नयाँ कार्यसमिति पनि चयन भएको छ। कार्यसमितिको उपाध्यक्षमा यति एयरलाइन्सबाट अनोज रिमाल, सौर्य एयरलाइन्सका गोपाल भट्टराई, अल्टिच्यूड एयरका निमा नुरु शेर्पा, महासचिवमा समिट एयरका मनोज कार्की, सचिवमा मनाङ एयरका राजु न्यौपाने, कोषाध्यक्षमा बुद्ध एयरका रुपेश जोशी, कार्यसमिति सदस्यहरुमा हेली एभरेष्टका फुरु ग्याल्जे शेर्पा, प्रभु हेलिकोप्टरका सुवास अमात्य, श्री एयरलाइन्सका अनिल मानन्धर, गुण एयरलाइन्सका प्रज्वल थापा, कैलास हेलिकोप्टरका श्रीहरि कुईकेल र एयर डाइनेष्टिका बालकृष्ण पण्डित चयन भएका छन्।

उक्त साधरणसभामा संस्कृति, पर्यटन तथा नागरिक उड्यन मन्त्री प्रेम बहादुर आलेले आन्तरिक उडानको सुरक्षाका लागि सरोकारवाला निकायहरुले सहकार्य गर्नुपर्ने बताए। उडानका क्रममा हुने बाधा अवरोधलाई कम गर्न र उडानलाई सुरक्षित बनाउन नागरिक उड्यन प्राधिकरणले बजेट छुट्टाएको जानकारी दिए।

कार्यक्रममा पर्यटन सचिव महेश्वर न्यौपानेले सरकारले परिस्थित अनूकल अपनाउने सुरक्षा मापदण्डहरुलाई वायु सेवा सञ्चालकहरुले सहजका साथ लिनुपर्ने बताए।

नागरिक उड्डयन प्राधिकरणका कार्यकारी निर्देशक राजकुमार क्षेत्रीले सुरक्षित उडानका लागि प्राधिकरण सजग रहेको र निजी क्षेत्रसँग मिलेर अघि बढ्ने बताए।

संघका नवनियुक्त अध्यक्ष क्याप्टेन रामेश्वर थापाले वायुसेवाको सुरक्षास्तरलाई अझै उचाईमा पुर्‍याउने र नेपाली वायुसेवाको सुरक्षा सूदृढीकरणलाई बढीभन्दा बढी विश्वासिलो बनाउँदै जाने बताए। आफ्नो कार्यकालमा उडान सुरक्षाको प्रतिबद्धता दोहोराए। मन्त्रालय, प्राधिकरण लगायतका नियामक निकायहरुसँग हातेमालो गर्दै नेपाली हवाई उद्योगमा रहेका विभिन्न समस्याहरुलाई निराकरण गर्नेसमेत उनले बताए।