सर्वोच्चको आदेश लिएर नागरिक उड्डयन प्राधिकरण पुगे राजकुमार क्षेत्री

समाचार

- न्युज नेपाल

काठमाडौं । सर्वोच्च अदालतको अल्पकालीन आदेश लिएर महानिर्देशक राजकुमार क्षेत्री नेपाल नागरिक उड्डयन प्राधिकरण कार्यालयमा पुगेका छन् । तर, हाजिर गर्न नपाई फर्किएका छन् ।

सोमबार बिहान बबरमहलस्थित प्राधिकरणको प्रधान कार्यालयमा क्षेत्री एक घण्टा बढी समय बसेका थिए । भोलिदेखि पुनः कार्यालय जाने उनले बताए ।

“सर्वोच्च अदालतको अल्पकालीन आदेशपछि कार्यालयमा हाजिर हुन गएको थिएँ । तर, प्राविधिक कारणले हाजिर गर्न पाइनँ,” उनले भने, “भोलिदेखि नियमित रूपमा कार्यालयमा जानेछु ।”

सर्वोच्चको अल्पकालीन आदेशले तत्काल सेवाबाट अवकाश निर्णय स्थगित गरिदिएको छ । अदालतले दुवै पक्षलाई यही फागुन ९ गतेका लागि बोलाएको छ ।

तर, प्राधिकरणका कानुन अधिकृतले नै अदालतले जारी गरेको अल्पकालीन आदेशले महानिर्देशकको रूपमा काम गर्नु भन्ने स्पष्ट आदेश नदिएको भन्दै हाजिर गर्न नदिइएको क्षेत्रीले बताए । “उहाँहरूले अदालतको आदेशलाई अलिकति घुमाउनुभएको छ । मैले मेरो वकिलसँग सल्लाह गरेर भोलिदेखि के गर्ने भन्ने निर्णय लिन्छु,” उनले भने ।

सरकारले प्राधिकरणको महानिर्देशकमा प्रदीप अधिकारीलाई नियुक्त गरिसकेको छ ।