मेलम्ची आयोजनाकाे कामप्रति जनप्रतिनिधिको चासाे

राजनीति

- न्युज नेपाल

काठमाडौं । काठमाडौं जिल्लाका जनप्रतिनिधिहरुले मेलम्ची खानेपानी आयोजनाका सम्बन्धमा सरकारको ध्यानाकर्षण गराएका छन् । काठमाडौं क्षेत्र नम्बर १ बाट प्रतिनिधिसभामा निर्वाचित सांसद एवम् कांग्रेस नेता प्रकाशमान सिंहको नेतृत्वमा काठमाडौंका जनप्रतिनिधिले ध्यानाकर्षण गराएका हुन् । उनीहरुले मेलम्ची खानेपानी आयोजनाको विषयमा प्रधानमन्त्री शेरबहादुर देउवालाई नौ बुँदै ध्यानाकर्षणपत्र बुझाएका छन् ।

ज्ञापनपत्रमा तत्काल गर्नुपर्ने कामहरुमा अघिल्लो वर्षको बाढीपहिरोबाट क्षति पुगेको मेलम्चीमा अहिले अन्यौल बढेकोे उल्लेख गरेका छन् । खानेपानी समस्या समाधानका लागि आयोजनालाई दिर्घकालीन रूपमा अगाडि बढाउनुपर्ने स्थलगत निरीक्षणको निष्कर्षसहित तत्काल र पछिसम्मका लागि गर्नुपर्ने कामको ९ बुँदामा सुझाव छ ।

यस्तै आर्थिक वर्ष २०७९/८० को बजेट वक्तव्यमा मेलम्ची खानेपानी विकास समिति खारेज गरेको उल्लेख भएकोले आयोजनाको काम कारवाहीमा अन्योल देखिएकोले तत्काल मेलम्ची खानेपानी विकास समिति ब्यूँताउनुपर्ने वा अन्य आवश्यक निर्णय लिनुपर्ने ज्ञापनपत्रमा उल्लेख छ ।

यस्तै मुहान क्षेत्रका स्थानीय तहको माग सम्बन्धमा सम्बन्धित पालिकासँग छलफल गरी टुगोंमा पुग्नुपर्ने, सिएमसीले राखेका माग कानूनको परिधिभित्र रही सम्बोधन गर्न आवश्यक कार्य गर्नुपर्र्ने,वर्षैभरी पानी पथान्तरणका लागि फास्टट्रयाकमा कार्यान्वयन गर्नु गराउन आवश्यक निर्णय लिनुपर्ने,कर्मचारीको तलबसुविधा लगायतका विषय तत्काल सम्बोधन गर्न आवश्यक कार्य लिनु पर्ने उल्लेख छ ।

यसैगरी ज्ञापनपत्रमा उल्लेख दीर्घकालीन रूपमा गर्नुपर्ने कामहरुमा बाढीपहिरोपछि सोको कारणबारे एसियाली विकास बैंक लगायतका अन्तर्राष्ट्रिय संघसंस्थाले अध्ययन गरि पेश गरेको प्रतिवेदनको निष्कर्ष अनुसार आयोजना अगाडी बढाउनुपर्ने, अहिले खानेपानीको ईन्टेक रहेको स्थान असुरक्षित भए नभएको प्राविधिकबाट अध्ययन गरी गराई असुरक्षित भए उपयुक्त स्थानमा ईन्टेक बनाउनुुपर्ने, मेलम्ची बाढिपहिरोले हेलम्बु गाउँपालिका र मेलम्ची नगरपालिकामा भएको क्षतिलाई सम्बोधन गर्न पुननिर्माण लगायतका उचित व्यवस्था गर्नुपर्ने, मुहान क्षेत्रमा सरकारले ध्यान नदिएका स्थानीयको गुनासो सम्बोधन गर्न मुहान क्षेत्रसम्म पक्की सडक बनाउनुपर्ने, शिक्षा र स्वास्थ्यमा सरकारले विशेष पहल गर्नुपर्नेलगायत बुँदाहरु छन् ।