नयाँ सरकार गठनमा दलहरुलाई चुनौती,दौडधुपमा व्यस्त

राजनीति

- न्यूज नेपाल

काठमाडौं । दलहरु नयाँ सरकार गठनको अभ्यासमा लागेका छन् । सरकार गठनसँगै शक्ति बाँडफाँटका लागि दलहरुले छलफललाई तीव्रता दिइरहेका बुझिएको छ। राष्ट्रपति विद्यादेवी भण्डारीलाई निर्वाचन आयोगले प्रतिनिधिसभा चुनावको अन्तिम प्रतिवेदन बुझाएसँगै नयाँ सरकार गठनमा दलहरुले अग्रसरता देखाएका हुन् । राष्ट्रपति भण्डारीले शुक्रबार र शनिबार प्रतिवेदन अध्ययन गर्नेछ। राष्ट्रपति भण्डारीले आगामी सोमवारसम्ममा संविधानको धारा ७६ (२) अनुसार सरकार गठनका लागि दलहरूलाई आह्वान गर्ने तयारी गर्दैछिन् ।

संविधानको धारा ७६ (१) मा कुनै एक दलले बहुमत पाएको अवस्थामा बहुमतप्राप्त संसदीय दलको नेतालाई प्रधानमन्त्री बनाउने व्यवस्था रहेको छ। तर चुनावबाट एउटै दलले बहुमत प्राप्त गर्न नसकेको हुँदा धारा ७६ (२( को प्रक्रियाअनुसार दुईभन्दा बढी दलको समर्थनमा नयाँ सरकार गठनका लागि राष्ट्रपतिबाट आह्वान हुने तयारी छ।

नया सरकार गठनसँगै दलहरुले राष्ट्रपति, उपराष्ट्रपति, प्रधानमन्त्री, सभामुख, उप सभामुख, मुख्यमन्त्री, प्रदेशका सभामुख र उप सभामुख चयन गर्नुपर्ने चुनौती रहेको छ । कुनै पनि दलले स्पष्ट बहमत नल्याएकाले प्रधानमन्त्री, मन्त्रीलगायत उच्च पदमा भागबन्डा गर्नुपर्ने अवस्था रहको छ । गत मंसिर ४ गते भएको निर्वाचनमा प्रतिनिधि सभातर्फ प्रत्यक्षबाट १ सय ६५ र समानुपातिक निर्वाचन प्रणालीबाट १ सय १० जना सांसद निर्वाचित भएका छन् । कुल सांसदको संख्या २ सय ७५ रहेको छ ।