सत्ता साझेदार दलबीच मन्त्रालय बाँडफाँडको लगभग टुंगो लाग्यो

राजनीति

- न्यूज नेपाल

काठमाडौं । सत्ता गठबन्धनमा आबद्ध दलहरूले मन्त्रालय बाँडफाँटको टुंगो लगाएको भनिए पनि अझै पूर्ण निर्णयमा नपुगेको देखिएको छ । बुधबार दिनभरि बसेर गरिएको निर्णयलाई बिहीबारमात्रै पूर्णता दिइने खबर सार्वजनिक भएको छ । प्रधानमन्त्री निवास बालुवाटारमा बुधवार बसेको गठबन्धन दलहरूको बैठकले मन्त्रालय बाँडफाँट गरेको बैठकमा सहभागी जनता समाजवाद पार्टी (जसपा) का नेता राजेन्द्र श्रेष्ठले पत्रकारलाई जानकारी दिनुभयो ।

नेता श्रेष्ठका अनुसार कांग्रेसलाई ८ मन्त्रालय, माओवादी केन्द्रलाई प्रधानमन्त्रीसहित ५, नेकपा एकीकृत समाजवादीलाई २, जसपालाई २, लोकतान्त्रिक समाजवादी पार्टी लोसपा० लाई १, नागरिक उन्मुक्ति पार्टीलाई १, आम जनता पार्टीलाई १, जनमत पार्टीलाई १ राज्यमन्त्रीसहित १ मन्त्रालय र नेपाल समाजवादी पार्टी (नेसपा) लाई १ मन्त्रालय बाँडफाँटको सहमति जुटेको छ । कुन दललाई कुन मन्त्रालय दिने भन्नेबारे यकिन भइनसकेको श्रेष्ठले बताउनुभयो ।

राष्ट्रिय स्वतन्त्र पार्टीलाई सरकारमा सहभागी गराउने विषयमा भने छलफल नभएको उहाँले बताउनुभयो । भोलि बिहीवार सरकार विस्तार गरेर भोलि नै शपथ ग्रहण गराउने तयारी भएको पनि नेता श्रेष्ठले बताउनुभयो ।