सामाजिक सञ्जालमा भाइरल होमनाथ न्यौपाने को हुन् ?

गतिविधि

- न्युज नेपाल

काठमाडौं। होमनाथ न्यौपानेलाई शिक्षण पेसाप्रति लगाव छ। सामाजिक सेवामा पनि सक्रिय छन्। विज्ञान विषयमा स्नात्तकोत्तर तह विशिष्ट श्रेणीमा उतिर्ण गरेर पनि ठूलो पदमा नलोभिइकन उनी गाउँठाउँमै भोलिका देशका कर्णधार बालबालिकालाई शिक्षा दिइरहेका छन् । योग्यता र क्षमता हुँदाहुँदै पनि कहिल्यै पद र पैसाको लोभ भएन ।उदाहरणीय व्यक्ति देखिएकाले नै आजभोलि उनी सामाजिक सञ्जालमा भाइरल भएका छन् ।

केही दिनदेखि चलिरहेको शिक्षक आन्दोलनमा पनि सक्रिय भएर लागेका छन् । सामाजिक सञ्जालमा उनी सयौं शिक्षकलाई वरपर राखेर सडक आन्दोलनमा आकर्षक नारा लगाएका देखिन्छन् । ‘जय गुरु जय देश’,’अघि बढ नेतृत्व खुट्टा कमाउन पाइँदैन’,’मन्त्री कसले बनायो हामी जस्ता गुरुले’,’गुरुको सम्मान हुनै पर्छ’ लगायतका नारा लगाउँदै अन्य शिक्षकहरुको साथमा हिँडेका छन् ।

उनी निजामतीको राम्रो जागिर छाडेर शिक्षण पेसामा सक्रिय भएकाले प्रशंसाको पात्र भएका छन् । यतिमात्रै होइन न्यौपाने दम्पति नै सरकारी शिक्षक सेवामा छन् । तर उनीहरुले छोरीलाई भने सरकारी विद्यालयमा नै पढाएका छन् ।

होमनाथ नवलपरासीको देवचुली नगरपालिकास्थित जनज्योति माविमा गणीत विषय पढाउँछन् । उनले सिंहदरबारमा निजामतीतर्फ खरिदार पदमा लगभग ६ वर्ष काम गरेका थिए । निजामती सेवाबाट राजनीना दिएरपछि उनी शिक्षण सेवामा आएका हुन् । उनी एमएस्सी, म्याथमा विशिष्ट श्रेणीमा उतिर्ण विद्यार्थी हुन् । उनकी पत्नी पनि स्थायी शिक्षिका हुन् । उनीहरुले आफ्नो एक मात्र सन्तान छोरीलाई कक्षा १० सम्म सामुदायिक विद्यालयमा पढाइरहेका छन् । उनकी छोरी परीक्षामा जिल्ला प्रथम भएकी छन्।

होमनाथ विद्यार्थीहरुलाई रमाइलो प्रदान गर्दै हौसला दिने गर्छन् । उनी अतिरिक्त पाठ्यक्रम गतिविधि(ईसीए)लगायत वृद्ध बुबाआमाको रेखदेख पनि गर्ने गर्छन् । सामाजिक सेवामा पनि उत्तिकै सक्रिय छन् ।