स्वास्थ्य ठीक भएपछि प्रधानमन्त्री प्रचण्ड बिहानै मुस्ताङ प्रस्थान

समाचार

- न्युज नेपाल

काठमाडौँ । प्रधानमन्त्री तथा नेकपा (माओवादी केन्द्र)का अध्यक्ष पुष्पकमल दाहाल प्रचण्ड आज बिहान मुस्ताङ प्रस्थान गरेका छन् ।

जलवायु परिवर्तन र हिमाली क्षेत्रमा तापमान वृद्धिका असरहरूबारे अध्ययन र स्थानीय जनतासँग अन्तरक्रिया गर्न उनी मुस्ताङ गएको उनको सचिवालयले जनाएको छ ।

सो क्रममा प्रधानमन्त्री प्रचण्डले राष्ट्रिय प्रकृति संरक्षण कोष र अन्नपूर्ण संरक्षण क्षेत्रका अधिकारीहरूसँग समेत अन्तरक्रिया गर्नेछन् ।

प्रधानमन्त्री प्रचण्ड छातीमा केही असहजता महसुस भएकाले मंगलवार दिउँसो स्वास्थ्य जाँचका लागि थापाथालीस्थित नर्भिक अस्पताल गएका थिए ।

स्वास्थ्य सामान्य भएपछि अस्पतालबाट उनी चाँडै फर्किएका थिए ।

अस्पतालले पनि मंगलवार साँझ एक विज्ञप्ति जारी गर्दै प्रधानमन्त्रीको स्वास्थ्य अवस्था सामान्य रहेको जनाएको थियो

‘स्वास्थ्य जाँचका क्रममा प्रधानमन्त्रीको रगत परीक्षण गर्दा ‘कार्डियाक इन्जाइम पोजेटिभ’ देखिएकाले उहाँको उपचारमा संलग्न चिकित्सकहरूद्वारा ‘एन्जियोग्राफी’ परीक्षण गरिएको र रिपोर्ट सामान्य रहेको छ’, अस्पतालद्वारा जारी विज्ञप्तिमा भनिएको छ ।