‘गणतन्त्रको रक्षा गर्नु संघीय लोकतान्त्रिक गणतन्त्रको मात्र होइन समाजवाद उन्मुख समावेशीताको रक्षा गर्नु हो’

अन्तर्वार्ता

- न्युज-नेपाल

काठमाडौं । नेकपा माओवादी केन्द्रका वरिष्ठ उपाध्यक्ष नारायण काजी श्रेष्ठले गणतन्त्रको रक्षा गर्नु भनेको संघीय लोकतान्त्रिक गणतन्त्रको मात्र नभएर समाजवाद उन्मुख समावेशी लोकतन्त्रको पनि रक्षा गर्नु रहेको बताएका छन् ।

आज जेठ १५ गते गणतन्त्र दिवसको अवसरमा सामाजिक सञ्जालमा गणतन्त्रको शुभकामना शन्देस दिँदै नेता श्रेष्ठले भनेका छन्,

‘ आज गणतन्त्रको रक्षा गर्नु भनेको संघीय लोकतान्त्रिक गणतन्त्रको मात्र होइन समाजवाद उन्मुख समावेशी लोकतन्त्रको रक्षा गर्नु पनि हो भन्ने कुरामा स्पष्टता आवश्यकता छ ।’

त्यस्तै उनले वर्तमान समयमा गणतन्त्र विरोधी प्रतिगामी शक्तिहरुले ठाउको उठाउन खोजिरहेको पनि जिकिर गर्दै यस्तो परिस्थिति उत्पन्न हुनुमा नेपालका प्रमुख राजनीतिक पार्टीहरु, तिनका नेताहरु, मूलतः नेपाली कांग्रेस र नेकपा एमाले जस्ता पार्टीहरूको यथास्थितिबादी प्रवृत्ति जिम्मेवार रहेको आरोप समेत लगाए ।

उनले भनेका छन्,‘सुशासन र समृद्धिको आजको राष्ट्रिय आवश्यकताका बिरुद्ध मूलतः सरकार र सरकारमा रहेका पार्टीहरूको भ्रष्ट, अलोकतान्त्रिक, निरङ्कुश एवं कपटी काम ,आचरण ,कार्यशैलीको कारणबाट जनतामा असन्तुष्टी, आकोश र निराशा पैदा भइरहेको छ र त्यसमा टेकेर प्रतिगामी शक्तिहरूले आफ्ना गतिविधिहरु अघि बढाइरहेका छन् ।

राजनीतिक अस्थिरता र त्यसको कारणबाट उत्पन्न नीतिगत अस्थिरताले सकारात्मक कामले निरन्तरता प्राप्त गर्न नसक्दा राज्यका अन्य महत्वपूर्ण अंगहरु न्यायालय ,कर्मचारीतन्त्र ,अख्तियार ,विश्वविद्यालय सहितको शिक्षा क्षेत्रमा लोकतान्त्रिक रुपान्तरण र पुनसंरचना हुन नसकेको र राजनीतिक भागबन्डा एवं अति राजनीतिकरणको कारणबाट ती अंगहरुमा समेत चरम भ्रष्टाचार संस्थागत भई देश र जनताको पक्षमा अपेक्षित सकारात्मक परिणाम दिन नसकेको उनको भनाई छ ।

त्यसैले यथास्थितिवादलाई अन्त्य गरेर सुशासन र सामाजिक न्याय सहितको समृद्धि हाँसिल गर्दा नै प्रतिगमनको खतरालाई अन्त्य गर्न सकिने उनको भनाई छ । प्रतिगमन मुर्दाबाद को राजनीतिक नाराले मात्र प्रतिगमनका खतरालाई अन्त्य गर्न सकिन्न । प्रतिमालाई रोक्ने अचुक अस्त्र सुशासन र समृद्धि हो ।

त्यस्तै, श्रेष्ठले संविधान संशोधन र ठूलो सुधारको एजेण्डा लाई अभियानात्मक रुपमा अघि बढाउन र सम्पूर्ण देशभक्त शक्तिहरू एक भई राष्ट्रिय एकता बलियो बनाउँदै राष्ट्रिय सार्वभौमिकता ,भौगोलिक अखण्डता ,राष्ट्रिय स्वाधिनता एवं हितको रक्षा तथा सुदृढीकरण गर्न आह्वान पनि गरेका छन् ।