संस्कृत स्नातक सेवामण्डलीको आयोजनामा हुवाहिनमा गुरु पूर्णिमा विशेष कार्यक्रम सम्पन्न

विश्व प्रवास

बैंकक । गुरु पूर्णिमा महोत्सव यस वर्ष थाइल्याण्डको हुवाहिन शाखामा भव्यरुपमा सम्पन्न भएको छ । व्यासपूजा, गुरु पूजा, हवन, पाठ, गुरु महिमा, वेद, उपनिषद् र गुरुतत्व विषयमा चिन्तन-मन्थन कार्यक्रम गर्दै गुरु पूर्णिमा सम्पन्न भएको हो । आयोजक संस्कृत स्नातक सेवामण्डली थाइल्याण्डले हुवाहिन शाखामा गुरु पूर्णिमाको अवसरमा उपस्थित हुने सबैमा हार्दिक धन्यवाद व्यक्त गरेको छ ।

कार्यक्रमका प्रमुख अतिथि डेविड खनाल रहनु भएको थियो । कार्यक्रममा थाई नेपाली संघका अध्यक्ष लक्ष्मण केसी, संरक्षक कुमार कार्की, केन्द्रीय समितिका पदाधिकारी तथा सदस्यहरु, विभिन्न शाखा समितिका पदाधिकारी तथा सदस्यहरु, हुवाहिन शाखा समितिका पदाधिकारी तथा सदस्यहरु, महिला समितिका पदाधिकारी तथा सदस्यहरु, गुरुवर्ग, भक्तजनलगायतको सक्रिय सहभागिता रहेको थियो ।

आयोजक संस्कृत स्नातक सेवामण्डली थाइल्याण्डले विज्ञप्ति जारी गर्दै भनेको छ, “आदरणीय गुरुजन, अतिथिगण, सम्पूर्ण श्रद्धालु एवं सहभागी महानुभावहरू,हाम्रो संस्था संस्कृत स्नातक सेवामण्डलीद्वारा आयोजित गुरु पूर्णिमा विशेष कार्यक्रम सफलतापूर्वक सम्पन्न गर्न पाउनु हामी सबैका लागि गर्वको विषय हो। गुरु पूर्णिमाको पवित्र अवसरमा उपस्थित भई समय, श्रम र सहयोग पुर्‍याउनु भएका समस्त गुरुजन, वक्ता गण, स्वयंसेवक, दातागण तथा उपस्थित महानुभावहरूलाई हाम्रो तर्फबाट हार्दिक धन्यवाद र आभार प्रकट गर्न चाहन्छौं । तपाईंहरूको अमूल्य समय, आशीर्वाद, प्रेरणा र सक्रिय सहभागिताले नै यस कार्यक्रममा आध्यात्मिक संस्कार र समर्पणको वातावरण सिर्जना गर्यो”, विज्ञप्तिमा थप उल्लेख गरिएको छ ।

गुरु–शिष्य परम्पराको सम्मानस्वरूप गरिएको यस कार्यक्रमले सबैलाई गुरु र सनातन धर्म, संस्कार, संस्कृति, परम्परा र रीतिरिवाजप्रतिको नयाँ ऊर्जा, ज्ञान र मार्गदर्शन प्रदान गरेको संस्कृत स्नातक सेवामण्डलीले उल्लेख गरेको छ। आगामी दिनहरूमा पनि यस्तै साथ, समर्थन र सहभागिता प्राप्त हुने विश्वासका साथ, पुनः एकपटक सदैव ऋणी छौं भन्ने भावनासहित सेवामण्डलीले सबैमा धन्यवाद ज्ञापन गरेको छ ।

यसैबीच गुरु पूर्णिमा विशेष कार्यक्रम सकिएपछि ‘शिव पञ्चायन मन्दिर हुवाहिन परियोजना’ सम्बन्धमा बृहत् छलफल भएको थाइ नेपाल संघ थाइल्याण्डका संरक्षक कुमार कार्कीले जानकारी दिनु भयो । शिव पञ्चायन मन्दिर बनाउने सम्बन्धी छलफलमा हुवाहीनस्थित नेपाली समूदायका व्यक्तिहरुको उल्लेखनीय सहभागिता रहेको थियो । मन्दिर निर्माण समितिको अध्यक्षमा प्रभुलाल प्रधानलाई भेलाबाट चयन गरिएको छ । इन्जिनीयरलाई बोलाएर मन्दिरको डिजाइन बनाउन आग्रह गरिएको कार्कीले यस सञ्चारमाध्यमलाई थप जानकारी दिनु भयो ।