आमरण अनसनरत मेयर तीर्थराज भट्टराई अस्पताल भर्ना

राजनीति

- न्यूज नेपाल

काठमाडौं । माइतिघर मण्डलामा अामारण अनशनरत खोटाङको दिक्तेल रूपाकोट मझुवागढी नगरपालिकाका मेयर तीर्थराज भट्टराई अस्पताल भर्ना भएका छन् ।उनलाई प्रहरीले साउन १४ गते राति करिब १० बजे वीर अस्पताल पुर्‍याएको हाे ।

स्वास्थ्य जाँचका निम्ति उनलाई वीरको इमर्जेन्सीमा राखिएको वार्ता समितिका सदस्य एवं दिक्तेल रूपाकोट मझुवागढी–१२ का वडाध्यक्ष दानबहादुर राईले बताए ।

भट्टराईलाई बुधबार बेलुका ५ बजेपछि प्रहरीले अस्पताल लान खोजे पनि उनले मानेका थिएनन् । त्यसपछि राति १० बजे प्रहरीले एम्बुलेन्समा वीर अस्पताल पुर्‍याएको हो । “मेयरको प्रेसर कम छ । उहाँ स्वास्थ्य अवस्था बिग्रिए पनि माइतीघरमै बस्ने भनी हस्ताक्षर गरिसक्नुभयो ।”वार्ता समितिका एक सदस्यले बताए ।

तीनदिने सत्याग्रहपश्चात् पनि माग सम्बोधन नभएपछि मेयर भट्टराईले बुधबारदेखि आमरण अनशन थालेका थिए । सातबुँदे माग राखेर गएको आइतबारदेखि उनले काठमाडौंको माइतीघरमा सत्याग्रह थालेका थिए ।

मेयर भट्टराईले हिमाल र प्रकृति जोगाउनुपर्ने, बाँसका सामग्री प्रयोग गर्न नीति बनाउनुपर्ने, बाँदर व्यवस्थापन गर्नुपर्ने, स्थानीय उत्पादन प्रवद्र्धन गर्नुपर्नेलगायत माग गरेका छन् ।

मेयर भट्टराईसँग सरकारी टोलीले बुधबार एक चरणको वार्ता समेत गरेको थियो । वार्ता सकारात्मक रहेको वार्ता समितिका एक सदस्यले जनाएका छन् ।