उत्तराखण्ड बाढीः नेपालीहरूको उद्धारका लागि सरकारकाे कूटनीतिक पहल

राजनीति

- न्यूज नेपाल

काठमाडौं । छिमेकी राष्ट्र भारतको उत्तराखण्डमा आएको बाढीमा परी हराएका भनिएका नेपाली नागरिकको खोजी एवं उद्धारका लागि सरकारले कूटनीतिक पहल सुरु गरेकाे परराष्ट्रमन्त्री डा आरजु राणा देउवाले बताएकी छन् ।

सामाजिक सञ्जालमा एक सन्देश जारी गर्दै परराष्ट्रमन्त्री राणाले बाढीमा परेर केही नेपाली पनि बेपत्ता भएका समाचार आए लगत्तै उनीहरूको खोजी र उद्धारका लागि कूटनीतिक पहल सुरु भएको उनले जानकारी दिएकी हुन् ।

उक्त बाढीमा परेर नेपाली नागरिक पनि बेपत्ता भएको भन्ने खबरले आफू निकै दुःखी भएको बताउँदै परराष्ट्रमन्त्री डा राणाले उनीहरूको खोजी र उद्धारका लागि नेपाल सरकारले कूटनीतिक पहल थालेको बताइन् ।

“हराएका नेपाली नागरिकको खोजी तथा उद्धारका लागि भारत सरकारको समन्वयमा तदारुकताका साथ लाग्न नयाँदिल्लीस्थित नेपाली राजदूतावासलाई निर्देशन दिएकी छु”, मन्त्री डा राणाले सो बाढीपहिरोमा ज्यान गुमाउने सबैप्रति भावपूर्ण श्रद्धाञ्जली अर्पण गर्दै दुःखको घडीमा रहेका परिवारजनमा समवेदना व्यक्त गरिन् ।

सार्वजनिक भएका समाचार अनुसार हालसम्म उक्त बाढिमा परेर कम्तिमा १७ जना बेपत्ता भएकाे र केहीकाे मृत्यु भएकाे समेत बताइएकाे छ । जसमा जाजरकोट, जुम्ला र बर्दियाका १७ भन्दा बढी नेपाली सम्पर्कविहीन भएकाे त्यहाँका स्थानिय तह सरकारहरूले बताएका छन् ।