‘नाडा अटो शो’ झन्डै ४८ हजारले गरे अवलोकन

काठमाडाैं  । भृकुटीमण्डपमा चलिरहेको ‘नाडा अटो शो’ मा दुई दिनको अवधीमा झन्डै ४८ हजार जनाले अवलोकन गरेका छन् । पहिलो दिन अस्ति १९ हजार सात सय र दोस्रो दिन हिजो २८ हजार नौ सय जनाले अवलोकन गरेको आयोजक नेपाल अटो मोबाइल एसोसिएसनले जनाएको छ ।

शो मा विशेषगरी ‘उड्ने ट्याक्सी’ हेर्नेहरुको भीड देखिएको छ । शो अवधिभर एक लाख भन्दा बढीले अवलोकन गर्ने आयोजकको अपेक्षा छ । शो हरेक दिन बिहान साँढे १० बजे देखि साँझ ७ बजेसम्म सञ्चालन हुँदै आएको छ ।

शो मा बैङ्कहरुले सस्तो ब्याजदरमा गाडी किन्न कर्जा दिने गरी नयाँ योजना सार्वजनिक गरेका छन् । शो लाई लक्षित गरेर वाणिज्य बैङ्कहरुबीच अटो कर्जाको ब्याजदर सस्तो बनाउन प्रतिष्पर्धा देखिएको छ ।

२० मध्ये सात वटा वाणिज्य बैङ्कले स्थिर र परिवर्तनीय दुवै ब्याजदरमा आकर्षक अफर सार्वजनिक गरेका छन् । अटो कर्जाको ब्याजदर न्यूनतम ६.२३ प्रतिशतदेखि अधिकतम ८.२५ प्रतिशतसम्म रहेको छ ।

शो मा विभिन्न कम्पनीहरूले प्रदर्शनी स्थलमा नयाँ–नयाँ कारलगायत गाडी सार्वजनिक गरेका छन् । कम्पनीहरूले अटो शो लक्षित गरी आकर्षक मूल्य तोकेका छन् ।

मेलामा राखिएका मोटरसाइकल र स्कुटरले युवाको ध्यान तानेको छ । प्रदर्शनीमा १९ वटा चारपाङ्ग्रेको ‘ब्राण्ड’, १३ हलुका गाडीका ब्राण्ड, चार वटा दुई पाङ्ग्रे गाडीका ब्राण्ड, पार्टपुर्जाका ३५ वटा कम्पनीले आ–आफ्ना उत्पादन राखेका छन् । शो आउँदो आइतवारसम्म चल्नेछ ।

Comments