आज एमालेले काठमाडौंमा वृहत जनप्रर्दशन गर्दै !

राजनीति

- न्युज नेपाल

काठमाडौं । आज मंसिर ६ गते शनिबार नेकपा एमालेले काठमाडौंमा जनप्रर्दशन गर्दैछ । एमाले बागमती प्रदेश कमिटीको आयोजनामा भृकुटीमण्डपमा प्रदर्शन तथा सभा हुन लागेको हो ।

भदौ २३ र २४ गतेको जेनजी आन्दोलनपछि देशव्यापी रुपमा आफ्ना कार्यक्रम विस्तार गर्दै लगेको एमालेले वडा, पालिका, जिल्लाका सदरमुकाम हुँदै आज शनिबार काठमाडौँमा केन्द्रीयस्तरको कार्यक्रम गरेर जनप्रदर्शन गर्न लागेको हो ।

आजको प्रर्दशनलाई एमालेले यसलाई ‘शान्तिपूर्ण जनप्रदर्शन तथा जनसभा’ भनेको छ । जनसभा भृकुटी मण्डपमा हुनेछ । एमालेका नेता,कार्यकर्ता,जनसंगठन,सम्पर्क समन्वय कमिटीका तर्फबाट निकालिने र्याली प्रदर्शनी मार्गमा जम्मा हुनेछ । प्रदर्शनी मार्गबाट रत्नपार्क परिक्रमा गरेर भृकुटी मण्डपमा आमसभामा परिणत हुने बताइएको छ । जनसभामा अध्यक्ष केपी शर्मा ओलीले सम्बोधन गर्ने छन् ।

प्रतिनिधि सभा विघटनविरुद्ध सडकदेखि अदालतसम्म उपस्थिति जनाउन खोजेको एमालेले आजको जनसभालाई एमालेले आन्तरिक शक्ति मजबुत भएको सन्देश दिने कार्यक्रमका रुपमा पनि लिएको छ । एमालेले संसद विघटन र सुशीला कार्की नेतृत्वको सरकार असंवैधानिक भन्दै आएको छ ।

एमाले पोलिटब्युरो सदस्य नेता महेश बस्नेतले जनसभामा देशभरका पार्टी नेता कार्यकर्ताको उपस्थिति रहने बताए । जनसभामा सहभागी हुने जिल्लाजिल्लाबाट बिहानैदेखि नेता कार्यकर्ता राजधानी प्रवेश शुरु भएको छ ।

असोज ३१ गते सम्पन्न भएको केन्द्रीय कमिटीको बैठकले गरेको जनपरिचालनको निर्णयअनुसार कात्तिक २२ गते देशैभरका वडामा एमालेले वडा भेला गरेको थियो । २५ गते सबै पालिकामा पालिकास्तरीय र्याली गरेको थियो । कात्तिक २९ गते सबै जिल्लामा जिल्लास्तरीय जनसभा भइसकेको छ ।