जता पुगे पनि विरोध मात्रै !

काठमाडौं । नेकपा एमालेका पोलिट्ब्युरो सदस्य महेश बस्नेत जहाँ पुगे पनि विरोधको सामना गर्न थालेका छन् । पछिल्ला दिनहरूमा देशका विभिन्न जिल्लामा आयोजना गरिएका कार्यक्रमहरूमा उनको उपस्थितिलाई लिएर जेनजी युवाहरूले निरन्तर प्रदर्शन गर्दै आएका छन् ।

बुधबार बिहान कैलालीको धनगढी बजारमा जेनजी युवाहरूले प्लाकार्डसहित विरोध प्रदर्शन गरेका हुन् । राष्ट्रिय युवा संघले आयोजना गरेको युवा जागरण अभियानलाई सम्बोधन गर्न बस्नेत धनगढी जाँदै छन् । बस्नेतको विरोधमा धनगढीको जेन–जी मार्गनजिक हसनपुरमा युवाहरूको समूहले प्लेकार्डसहित प्रदर्शन गरिरहेका छन् ।  

२३ र २४ गते भएको जेनजी आन्दोलनपछि एमाले नेतृत्वको सरकार विस्थापित भएपछि बस्नेतले जेनजी युवाप्रति दिएका कडा अभिव्यक्तिले आक्रोश बढाएको युवाहरूको भनाइ छ । त्यसयता उनी सहभागी हुन लागेका कार्यक्रमहरूमा विरोधका दृश्यहरू दोहोरिइरहेका छन् ।

गत ४ मंसिरमा बाराको परवानीपुरमा आयोजित कार्यक्रममा सहभागी हुन लाग्दा पनि उनको आगमनको विरोधमा प्रदर्शन भएको थियो । सो घटनापछि सिमरा क्षेत्र दुई दिनसम्म तनावग्रस्त बनेको थियो । त्यस्तै, ७ मंसिरमा इटहरी जाँदै गर्दा बस्नेत सवार गाडीमा रातो रङ भरिएको बेलुन प्रहार गरिएको घटना पनि चर्चामा आएको थियो ।

यसै क्रममा मंगलबार सुर्खेतमा पनि बस्नेत सहभागी कार्यक्रमलाई लक्षित गर्दै युवाहरूले प्रदर्शन गरेका थिए । लगातार भइरहेका यस्ता घटनाले उनी जहाँ पुगे पनि विरोधको सामना गर्नुपर्ने अवस्था सिर्जना भएको छ ।

राजनीतिक विश्लेषकहरूका अनुसार बस्नेत र जेनजी युवाबीच बढ्दो टकरावले आगामी दिनमा थप तनाव निम्त्याउने संकेत देखिएको छ । यता, सम्बन्धित पक्षले भने शान्तिपूर्ण संवादमार्फत समस्या समाधान गर्नुपर्ने बताएका छन् ।

Comments

• न्युज नेपाल
• महेश बस्नेत