सहारा नेपाल साकोसको २९औँ साधारण सभामा पत्रकार शिव भट्टराई भोजपुरे सम्मानित

अर्थ र बाणिज्य

सलकपुर (मोरङ) । “मेरो गौरव, मेरो सहारा सबैका लागि, सधैंका लागि” भन्ने मूल नाराका साथ सहारा नेपाल बचत तथा ऋण सहकारी संस्था लिमिटेडको २९औँ वार्षिक साधारण सभा भव्यरूपमा सम्पन्न भएको छ।

सहारा नेपाल साकोस सेवा केन्द्र विराटचोकको आयोजनामा सुन्दरहरैचा–८, सलकपुरस्थित भुल्के साकोसको सभाहलमा यही पुष ३ गते बिहिबार साधारण सभा सम्पन्न हो । साधारणसभाको अवसरमा सहारा सहकारी पत्रकारिता पुरस्कार अन्तर्गत सुन्दरहरैचा अपडेटका सञ्चालक शिव भट्टराई भोजपुरेलाई सम्मान गरिएको थियो ।

सहकारी अभियान, स्थानीय विकास र समुदायका गतिविधिहरूलाई निरन्तर उजागर गर्दै पत्रकारिता मार्फत योगदान पुर्‍याएको मूल्यांकन स्वरूप भट्टराईलाई सम्मान गरिएको आयोजकले जनाएको छ।

पत्रकारिताको माध्यमबाट समाजमा घटेका घटनाहरूलाई सत्य–तथ्य रूपमा उजागर गर्नुका साथै विशेष गरी सहकारी क्षेत्रको समग्र विकास, पारदर्शिता र सचेतनामा योगदान पुर्‍याएको उच्च मूल्याङ्कन गर्दै भट्टराईलाई सम्मान गरिएको संस्थाले जनाएको छ।

त्यसैगरी संस्थाले सोही अवसरमा प्रो ।मोहम्मद युनुस पुरस्कार, उत्कृष्ट उद्यमी पुरस्कार, राष्ट्रिय प्रतिभा पुरस्कार, उत्कृष्ट कारोबार पुरस्कार अन्तर्गत सहकारीका सदस्यहरूलाई सम्मान सहित पुरस्कृत गरेको थियो।

साधारण सभामा सुन्दरहरैचा–१२ की वडा सदस्य निलम थापाको प्रमुख आतिथ्य रहेको थियो भने सेवा केन्द्र सहयोग समितिका संयोजक चिरञ्जीवी रेग्मीको सभापतित्व रहेको थियो। कार्यक्रमको सञ्चालन सेवा केन्द्र प्रमुख कुसुम चुडालले गरेकी थिइन्।