अधिवक्ता मञ्जु मिश्र कैलाली–३ बाट स्वतन्त्र उम्मेदवार

मिश्रले, इन्टरनेशनल बिजनेस एन्ड ट्रेड ल, समाजशास्त्र तथा मानवशास्त्र स्नातकोत्तर गरेकी छिन्।

प्रदेश

- न्यूज नेपाल

धनगढी । युवा कानुन व्यवसायी अधिवक्ता मञ्जु मिश्र आगामी प्रतिनिधिसभा निर्वाचनमा कैलाली निर्वाचन क्षेत्र नम्बर ३ बाट स्वतन्त्र उम्मेदवारका रूपमा चुनाव लड्ने भएकी छन्।

एमाले निकट मानिँदै आएकी अधिवक्ता मिश्रले पार्टीभित्र देश र जनताप्रति देखिएको गैरजिम्मेवारीका कारण आफू स्वतन्त्र रूपमा निर्वाचनमा होमिएको बताइन्। समाजशास्त्र, मानवशास्त्र र कानुनशास्त्रमा स्नातकोत्तर गरेकी मिश्र कैलाली जिल्लामा समाजसेवी तथा पत्रपत्रिकामा लेख लेख्ने लेखिका रूपमा पनि परिचित छिन्।

पुरानो पुस्ताले नेतृत्व हस्तान्तरण नगरेको अवस्थालाई चुनौती दिँदै युवा पुस्ताले हस्तक्षेपमार्फत आफ्नै नेतृत्व स्थापित गर्नुपर्ने धारणा मिश्रको छ। सुदूरपश्चिमलाई गरिबीबाट मुक्त गर्ने, पछाडि परेको वर्गको उत्थान गर्ने, सुशासन कायम गर्न प्रभावकारी रणनीति बनाउने तथा छाउपडी, कमैया, कम्लहरीजस्ता कुप्रथालाई व्यवहारिक रूपमा अन्त्य गर्ने विषयलाई उनले प्रमुख चुनावी मुद्दा बनाउने बताइन्।

त्यस्तै, हिन्दु राष्ट्र कायम राख्ने, प्रदेश संरचना हटाउने र स्थानीय तहलाई थप सशक्त बनाउनु पर्ने धारणा पनि आफ्नो रहेको उल्लेख गर्दै ती विषयलाई समेत चुनावी एजेन्डाका रूपमा अघि सार्ने मिश्रले जानकारी दिइन्।

गहकिला लेख, कविता र गजलसमेत लेख्ने मिश्रलाई पत्रकारिता तथा साहित्यिक क्षेत्रमा ‘मञ्जु मिश्र रोशी’ नामले चिन्नेहरू पनि प्रशस्तै छन्।

घोडाघोडी नगरपालिका–१० की स्थायी बासिन्दा मिश्रले घोडाघोडी नगरपालिकाले ५१ विद्यालयका प्रधानाध्यापक फेरबदल गर्ने निर्णयविरुद्ध अदालतमा मुद्दा दायर गरी उक्त निर्णय फिर्ता गराउन सफल भएकी थिइन्।

इन्टरनेशनल बिजनेस एन्ड ट्रेड लमा स्नातकोत्तर गरेकी अधिवक्ता मिश्रले अन्तर्राष्ट्रिय व्यापार तथा वाणिज्य कानुनसम्बन्धी मुद्दामा विशेष चासो राख्दै आएकी छन्।