निर्वाचनका दिन देशबाट एक हजारभन्दा बढी यात्रु बाहिरिएकाे तथ्यांक

अर्थ र बाणिज्य

काठमाडौँ। प्रतिनिधि सभा सदस्य निर्वाचनका दिन देशबाट एक हजारभन्दा बढी यात्रु बाहिरिएका छन् । त्रिभुवन अन्तर्राष्ट्रिय विमानस्थल कार्यालयका अनुसार बिहीबार मतदानका दिन स्वदेशी र विदेशी गरी एक हजार ८३५ यात्रु बाहिरिएका हुन् ।

विमानस्थलका सूचना अधिकारी तेजबहादुर पौड्यालले मतदानका दिन अन्तर्राष्ट्रियतर्फ २० वटा उडान र १९ अवतरण भएको जानकारी दिनुभयो । उहाँले भन्नुभयो, “मतदानका कारण आन्तरिकतर्फको उडान ठप्पप्रायः भए पनि अन्तर्राष्ट्रियतर्फ भने सङ्कटग्रस्त पश्चिम एसियाली मुलुकबाहिरका गन्तव्यमा यात्रुले उडान सेवा लिएका छन् ।”

पछिल्लो समय अन्तर्राष्ट्रितर्फ दैनिक एक सय र आन्तरिकतर्फ दैनिक २५० हाराहारी उडान हुँदै आएकामा बिहीबार आन्तरिकतर्फका वायुसेवा कम्पनी र यात्रुले सवारी असहजताका कारण उडान नगरेपछि दुई वटा मात्रै उडान भएको उहाँले बताउनुभयो । आन्तरिकतर्फ नेपाल वायुसेवा निगमले भोजपुर र श्री एयरलाइन्सले सुर्खेतबाट एक/एक मात्रै उडान गरेका हुन् ।

विमानस्थल कार्यालयका अनुसार पश्चिम एसियाली मुलुकमा रोकिएको हवाई उडानका कारण ट्रान्जिटमा रोकिएका यात्रुलाई सेवा दिइने गरी उडान सुरु भएको छ । फ्लाई दुबई र एयर अरेबियाले नेपालमा हुने उडानमा ट्रान्जिटका यात्रुलाई ल्याउने र नेपालबाट यता रोकिएका यात्रुलाई लैजान सुरु गरेका छन् ।

बुधबार दुवै वायुसेवा कम्पनीले नेपालमा एक/एक उडान गरेका छन् । त्यस्तै कतार एयरवेजले पनि युरोपका देशमा अलपत्र परेका यात्रुको उद्धार उडान सुरु गर्ने जनाएको छ । हाल नेपालमा दैनिक तीन उडान गर्दै आएको वायुसेवा कम्पनीले सार्वजनिक गरेको उद्धार उडान हुने गन्तव्यको सूचीमा नेपाल भने समावेश छैन । कतार एयरवेजका दुई वटा ठुला जहाज फागुन १६ देखि काठमाडौँमै रोकिएका छन् ।

पश्चिम एसियाका देशमा चर्किएको युद्ध र हवाईक्षेत्र बन्दका कारण नेपालमा ओहोरदोहोर हुने जजिरा, कुवेत, एयर अरेबिया, फ्लाई दुबाई, नेपाल वायुसेवा निगम, कतार एयरवेज र हिमालय एयरलाइन्सको मध्यपूर्वी क्षेत्रमा हुने उडान दैनिक रद्द हुँदै आएका छन् ।