व्यवसायी भट्टमाथि सम्पत्ति शुद्धीकरण मुद्दामा कारबाही अघि बढ्यो, पासपोर्ट रोक्का

राजनीति

काठमाडौं । गैरकानुनी रूपमा सम्पत्ति आर्जन गरेको आरोप लागेका व्यवसायी दिपक भट्टमाथि सरकारले कारबाही प्रक्रिया अघि बढाएको छ। राजनीतिक पहुँचको दुरुपयोग गर्दै अवैध रूपमा सम्पत्ति बढाएको आरोपपछि उनीमाथि छानबिन सुरु गरिएको हो। सम्पत्ति शुद्धीकरणसम्बन्धी मुद्दामा अनुसन्धान तथा आवश्यक कारबाहीका लागि सरकारले उनको राहदानी (पासपोर्ट) समेत रोक्का गरेको छ।

सम्पत्ति शुद्धीकरण अनुसन्धान विभागको पत्रका आधारमा भट्टको राहदानी कालोसूचीमा राखिएको अध्यागमन विभागले जनाएको छ । उनीमाथि राजनीतिक पहुँचको दुरुपयोग गर्दै गैरकानूनी सम्पत्ति आर्जन गरेको आरोप छ ।

विभागले बैंकिङ र बिमा सम्बन्धी कसूर, राजस्व छली, सार्वजनिक सम्पत्तिको हानि–नोक्सानी जस्ता कार्यमा अनुसन्धान गरिरहेको स्रोतले जनाएको छ । विभागले भट्टका नातेदारहरूमाथि पनि छानबिन अघि बढाएको छ । उनीकी श्रीमती आयुस्मा नेपाल, सासु अन्जना नेपाल लगायतको सम्पत्तिमाथि छानबिन अघि बढाइएको बुझिएको छ ।